古月金帛 的部落格

     昨昏，去菜市仔，共一位阿伯仔買一包白煠兮竹筍仔，暗頓，共這包煠好閣切便便兮竹筍仔，洗清氣了後，切一寡薑絲，用油落去煏芡香，舀一匙仔大嫂家己豉兮鳳梨豆醬仔，參落去炒，彼號氣味綴咧鼎底熁起來衝入去鼻空裡，予人強欲流喙瀾，緊伸手拈一塊窒入去喙空，吸一口氣，彼種佮喙和滿足，是屬於家己獨特兮懷舊口味。

 昨昏佇路咧行，看著一隻狗公，伊兮喙箍，予主人用喙罨掩著，伊看起來，生作瘦瘦、袂歹，敢講伊有咬過人，抑是主人驚伊烏白食，會食到孬物仔？掛喙罨實在誠礙虐，喙袂當擘開，也袂使吠，甘但會使尾仔搖咧搖咧。記得細漢時，阮兜飼一隻軍用狗〈狼犬〉，阮攏共伊叫kuLo，會顧厝，若看到生份人，著一直吠，阿爸真疼伊，定定予綴出門，有時陣綴去園做穡，有一擺，阿爸駛牛車去溪埔，遐離厝有四、五里路遠，伊總是綴牛車後一直到溪埔，到暗頭仔，工課做煞欲轉來時，綴佇牛車後兮KULO，感覺足無聊，家己踅對園內，沿途賴賴趖，牛車駛到厝矣，閣無看到KULO轉來，阿爸共牛綁咧豬滌邊，大聲呼KULO！KULO！咻攏無，無偌久，KULO佇外面傱轉來，喈喈叫，四跤滾躘，看起來敢若真艱苦，一觸久仔，喙裡浡出白泡瀾，身軀咇咇掣，阿爸真後悔，欲出門時無共掛喙罨，可能食到人下佇稻仔園兮鳥鼠藥矣。
 一遍，阿爸共親情借一隻牛，欲來倚蕃薯稜，彼隻牛犅兮喙箍，嘛掛一兮牛喙籠，阿爸講：牛真愛食豬菜，倚蕃薯稜時，看到蕃薯藤，著想愛食，會無心情，喝伊袂振動；牛若欲落稻仔園、甘蔗園、蕃薯園作工課，恐驚損蕩家己抑別人兮農作物，著共囊牛喙罨。

 
 受西南氣流影響，南部相紲大雨落咧幾落瞑日，園面規兮積水，圍佇水果園兮鵝仔，俍雨縫，嘛早晚正常共放出來菜園仔踅踅咧，予捻草仔。牠們逐日透早著頭擔擔，佇網仔門遐等，等門開開，五隻逗陣傱出來，尻川搖咧搖咧四界揣食。這幾工，牠們毛草予雨沃佮澹糊糊，鵝公看起來佮以前淡薄仔無仝，翼股一爿落落，行路擺咧擺咧真無精神，身體敢若各樣，我細漢時，阿母飼兮雞仔鴨仔若各樣，伊著搣幾粒仔靜露丸，共窒入去喙裡治療，我想欲討一寡靜露丸予食看覓；怹講：彼無效，緊掠去刣刣，無若死去無采。愿倆兮，看到伊佇遐欲死欲死，毋知欲按怎好。我咧想，是毋是共牠賸落來兮價值，予人作菜配；嘛閣想，欲死矣，閣共割一刀，真不忍心，不如予自然死。動物身體若故障，借外力共結束生命，遮敢叫做安樂死，若無佇遐拖咧拖咧，看來嘛感覺真可憐閣無尊嚴。鵝仔破病，袂哼袂叫，也袂能講伊佗位咧艱苦。

（這口灶）有人講是這家口仔兮人，彼口灶，是咧講，彼戶人家，這庄裡有幾口灶？是咧計算規兮庄頭有偌濟戶；這个灶嘛會使講這口灶。

佇農業年代，踮庄跤，若厝內有田園好種作，一家口仔，顧腹肚兮米糧便便，尚起碼三頓食食富足；農民佇透早天袂光，騎鐵馬、駛牛車落園作穡頭，牛車路兮車輪敲車轍轔轔叫，一年三期作，一家大小真無閒，拄到家己兮工課若有閬縫，著駛牛車去農場作農場工，車甘蔗、削蔗根仔，勞碌規年迵天，毋甘歇睏

＊ 

踏菜脯（二十五）

＊噯仔（二十三）

＊風拍筍＊（二十二）

＊大姊（十七）

﹝二十﹞＊養鴨人家〈逃冬〉
庄子尾蔗埕邊，水圳岸邊有一遍空曠所在，幾戶養鴨人家，飼養著鸕鴨〈菜鴨〉，沿岸段落，私人用亞鉛網作隔界線，往東北方，在鐵支路橋跤，有一兮活水池塘，池塘邊一斜坡地，是琵伯兮囝婿開取仔，飼了兩百外隻兮生蛋鴨母。五、六十年代，飼料未普及，飼鴨仔攏是遊牧式放養，南部稻作，收割較早，約在中秋前後，中北部收割，慢了一個外月，「養鴨人家」趕著鴨仔囝，撿食著佇稻穀收割時，落落土跤子兮栗粒仔，從南部往北部遷徙著，白天對這片田，趕過彼片田來放養，暗時，定點用亞鉛網仔將鴨群圍起來，飼鴨人經常露宿而眠，有時借宿異鄉，一季栗仔「收冬」完成後，鴨仔囝也慢慢長大，這時才將鴉群趕返來，擱用絞碎的豆箍弓予肥，生蛋鴨開始生蛋；養肥的菜鴨，規陣賣給鴨販，這種飼養方式，咱佮叫做〈逃冬〉。

＊生老囝（一）

＊生老囝（一）

＊賊仔（三）