close
下早仔透早，行路運動，踅對庄外，一片闊莽莽兮
田園，有兮拄矣播稻仔落去，真青翠，看起來疏櫳，還袂發真茂。這過，落遐爾仔久兮大雨，水敨袂離，一寡青菜攏浸浸死，一坵生真厚兮黑茄仔，爛爛去，閣交落佮規塗跤。干但有幾坵弓網仔衫兮菜園，種網室內兮菜，有通好遮閘，卡袂直接嗾雨，有兮死無去；有兩三个農民佇網室裡面，點一葩燈火咧薅菜，菜起大價，看怹勻勻撿，毋甘拍損，想講看有通好賣ㄧ寡肥料錢無。隔壁一坵九層塔，規坵死死謝謝薦薦去，規欉焦脯脯，賸園頭一逝，閣活佮青噴噴。拄咧好奇，著開喙問園頭家，伊講：規坵死去多咧悽慘了矣，彼逝留咧欲通做子，若閣死去，毋拄矣斷種。講話兮口氣予人毋知欲按怎接話，內心煞想到一句「為母則強」兮名言，九層塔為欲顧全後代，熬過一遍落遮濟瞑日兮大雨，予人真正感動；嘛感受到做穡人兮辛苦佮無耐。
全站熱搜
留言列表
