古月金帛 的部落格

 
 受西南氣流影響，南部相紲大雨落咧幾落瞑日，園面規兮積水，圍佇水果園兮鵝仔，俍雨縫，嘛早晚正常共放出來菜園仔踅踅咧，予捻草仔。牠們逐日透早著頭擔擔，佇網仔門遐等，等門開開，五隻逗陣傱出來，尻川搖咧搖咧四界揣食。這幾工，牠們毛草予雨沃佮澹糊糊，鵝公看起來佮以前淡薄仔無仝，翼股一爿落落，行路擺咧擺咧真無精神，身體敢若各樣，我細漢時，阿母飼兮雞仔鴨仔若各樣，伊著搣幾粒仔靜露丸，共窒入去喙裡治療，我想欲討一寡靜露丸予食看覓；怹講：彼無效，緊掠去刣刣，無若死去無采。愿倆兮，看到伊佇遐欲死欲死，毋知欲按怎好。我咧想，是毋是共牠賸落來兮價值，予人作菜配；嘛閣想，欲死矣，閣共割一刀，真不忍心，不如予自然死。動物身體若故障，借外力共結束生命，遮敢叫做安樂死，若無佇遐拖咧拖咧，看來嘛感覺真可憐閣無尊嚴。鵝仔破病，袂哼袂叫，也袂能講伊佗位咧艱苦。
 記得舊年，鵝母頭一擺生蛋，伊為著欲維護鵝母覅予人攪吵，人若行倚，牠著真歹，頷頸伸長長，欲共人捅，鵝囝出世後，嘛逐工佇牠們兮身軀邊綴前綴後，盡到伊做老爸兮責任，价鵝母共倆隻囝含出含入，一家口仔，看起來誠幸福。無疑悟，即馬鵝老爸煞來失落，毋知伊兮鵝家族，是毋是咧揣無伊。