古月金帛 的部落格

   最近，扞手頭兮家庭煮婦，攏會感受到，菜市仔兮菜蔬減少，菜價貴佮袂摸兮。時機孬，逐項物件攏起價，開錢進前，愛先共算盤提來面頭前觸觸兮，欲顧厝內一家大細三頓食食，扞鼎灶嘛閣愛學一寡變竅。今仔日去菜市仔，買一爿台東西瓜，賣水果兮頭家娘講：西瓜切好囥冰箱，西瓜皮毋好擲捒，傷拍損，外皮剾剾咧，瓜仔貮瓤切角，會使提來煮排骨。晚頓吃飯兮時，厝裡兮人，毋知影這鍋排骨是煮啥貨，大家食甲窸窣叫，是喙斗好，還是排骨湯頭好，原來西瓜嘛會使煮湯。   

  五、六0年代，隔壁一个叫「下蚶」兮庄頭，住家近下淡水溪，庄仔內兮人，佇下淡水溪，號地種西瓜，一大片沙質兮河川地，較會泄水，地質誠適合種西瓜，因為西瓜愛水閣驚浸。怹用人工鍤挖誠深兮窟仔，水窟仔出泉水，用肩頭一擔仔一擔，擔來沃西瓜，技術若孬，會那行那泏，搖到位，兩水桶滇滇兮水，著泏佮賸無一半，擔佮肩頭結趼。西瓜收成進前，若拄到梅雨，風颱、雨水暴漲，溪床一片汪洋，付出兮心血泡入水底。種西瓜賺兮是天公錢。

     西瓜，是熱天囡仔大細尚佮意兮水果，能消暑解渴，放尿閣大腹，西瓜提來絞汁，加一點仔梅仔粉，誠好啉。人講：王梨頭西瓜尾，是咧講較好食兮部位。西瓜倚大爿；咧講人傷現實，向有利頭兮所在倚。我咧想，大爿西瓜是肉較濟，一粒西瓜好食兮部位是佇中央。細漢兮時，序大人共囝仔講：「暗時袂使食西瓜，半瞑仔會反症」。西瓜破開，佇熱天時仔，誠緊著臭酸，以前無冰箱，放到晚時仔，若閣予胡蠅沾著，胃腸孬兮囡仔，暗頭仔食西瓜，半瞑仔煞腹肚疼，全部攏予西瓜來坐數。著講：『暗頭仔食西瓜，半瞑仔反症。』；佮人約束好兮代誌，反僥變卦，無信用，按尼就會予人講：暗時仔食西瓜半瞑仔反症。