昨昏佇路咧行，看著一隻狗公，伊兮喙箍，予主人用喙罨掩著，伊看起來，生作瘦瘦、袂歹，敢講伊有咬過人，抑是主人驚伊烏白食，會食到孬物仔？掛喙罨實在誠礙虐，喙袂當擘開，也袂使吠，甘但會使尾仔搖咧搖咧。記得細漢時，阮兜飼一隻軍用狗〈狼犬〉，阮攏共伊叫kuLo，會顧厝，若看到生份人，著一直吠，阿爸真疼伊，定定予綴出門，有時陣綴去園做穡，有一擺，阿爸駛牛車去溪埔，遐離厝有四、五里路遠，伊總是綴牛車後一直到溪埔，到暗頭仔，工課做煞欲轉來時，綴佇牛車後兮KULO，感覺足無聊，家己踅對園內，沿途賴賴趖，牛車駛到厝矣，閣無看到KULO轉來，阿爸共牛綁咧豬滌邊，大聲呼KULO！KULO！咻攏無，無偌久，KULO佇外面傱轉來，喈喈叫，四跤滾躘，看起來敢若真艱苦，一觸久仔，喙裡浡出白泡瀾，身軀咇咇掣，阿爸真後悔，欲出門時無共掛喙罨，可能食到人下佇稻仔園兮鳥鼠藥矣。
一遍，阿爸共親情借一隻牛，欲來倚蕃薯稜，彼隻牛犅兮喙箍，嘛掛一兮牛喙籠，阿爸講：牛真愛食豬菜，倚蕃薯稜時，看到蕃薯藤，著想愛食，會無心情，喝伊袂振動；牛若欲落稻仔園、甘蔗園、蕃薯園作工課，恐驚損蕩家己抑別人兮農作物，著共囊牛喙罨。
若寒人，驚剾冷霜風，出門毋管坐車、行路，抑是騎機車，四界攏會看到人掩一个喙罨，罨佮十花五色。幾年前，有一種傳染病叫〈煞士〉，病毒真厲害，喙罨無得買，予大家真驚慌，連奶帕仔馬提來做喙罨掩。即馬若去病院看醫生，驚細菌傳染人，喙罨罨咧，較有衛生。有時仔，定定佇電視鏡頭頂面，看到議員陪伴開記者會，當事人無愛暴露身份，麻掩喙罨。
最近，我因為鼻仔過敏，拄著孬空氣，鼻仔不時窒咧袂喘氣，
著共喙罨提來罨咧卡快活，掩一例久，予我發現一件真趣味兮代誌、馬足有效兮撇步；人兮心緒，綴著六觸起起落落，有當時仔，看到身軀邊，家己無合意，袂順眼、看袂過兮代誌，會開喙欲講，偌閣擋袂牢，就會變做踅踅唸，打歹氣氛，喙罨提來掩咧，伊不但袂翕氣，閣會使予人想到古早一句俗語：話到喙邊留三分。
留言列表
