古月金帛 的部落格

佇農業年代，踮庄跤，若厝內有田園好種作，一家口仔，顧腹肚兮米糧便便，尚起碼三頓食食富足；農民佇透早天袂光，騎鐵馬、駛牛車落園作穡頭，牛車路兮車輪敲車轍轔轔叫，一年三期作，一家大小真無閒，拄到家己兮工課若有閬縫，著駛牛車去農場作農場工，車甘蔗、削蔗根仔，勞碌規年迵天，毋甘歇睏

    阿母講：有阿公放落來即坵兩分地兮水田，通好作米母仔。稻仔兩季兮收成，曝焦囤囥粟倉內，是阮全家一年兮米糧。播田、挱田草、割稻仔，是价親友互相伴工。割稻仔是阮兜兮一大樂事，透早三點愛起來煮飯，天袂光，割稻仔伴就欲來食早頓，阿爸駛牛車，載著借來兮機器桶、茶水、一大疊兮麻布袋、麻繩仔、貫針，一摜人沖沖滾，等大家上工，阿母愛閣準備半晡仔兮點心，煮兩大鉎鍋綠豆仔糜，一坩鹹的，一坩甜的，鹹的綠豆仔糜，共浸好兮綠豆、米，用肉絲、紅蔥頭芡香、串仔魚切角、綠竹筍礤簽，作夥參落去煮；八點外九點袂到，陪阿母擔一擔綠豆糜，欲去田予割稻仔伴食，佇遠遠聽到割稻仔機ㄍㄚ！ㄍㄚ！響著，看他們手握稻穗，跤踏機器桶真心適，我拿了一小把學樣，無疑悟手中規把兮稻穗連稈，食食絞絞入去機器桶內，差一點仔，連人強欲予拖拖落去，予我驚价心臟噗噗惝。原來踏機器桶要練就一把工夫，機器桶是一種以腳踏為動力兮脫穀機，用來分離稻穀价稻稈兮農具，共頕垂兮稻穗，輕輕仔磕著快速轉踅兮輪軸，將粟粒彈脫到桶槽內。捎桶後兮人，粟埃颺颺飛，著共身軀掩咧密喌喌，包得留兩蕊目睭，伊愛仆佇桶槽仔，共稻桿屑捎挕捒，用捙箕共粟粒裝入麻布袋內，用鋼針縫紩布袋喙，予有力頭兮查甫，一袋一袋扛去放牛車頂。割稻仔佇炎熱兮天氣，汗水、粟芒，黏黐黐，刺刺兮粟芒予人感覺規身軀氅雞母皮；一粒五穀兮收成，按浸粟種、掖秧仔、薅秧播田、落肥，挲草、、、全是融合了農民兮汗水、淚水、雨水价天公伯眷顧。