古月金帛 的部落格

＊ 

踏菜脯（二十五）

   頂日去台北，順紲斡唯翁婿以前在職時官校的朋友遐，伊退休了後，轉去in故鄉作穡，過著田園的生活，蕃薯是雲林的特產。欲轉來時，送阮一寡日本種的蕃薯栽仔；外家茨大嫂知影，叫我去種子店糴二十箍菜頭種子，順紲寄踮蕃薯稜邊。伊講：先共菜股土培予稜高懸，蕃薯硩teh佇稜頂，菜頭寄墊稜邊，生長的菜頭才會長閣大箍；墊菜頭佮硩teh蕃薯要仝工，伊閣講：菜頭毋食隔瞑土。我咧想，是毋是大地萬物頭頂，攏有伊生長兮一遍天佮空間，菜頭麻毋愛「寄人籬下」。

   我佇稜邊擱疃一畦平股，準備賸一半的種子，欲用掖的，通好食菜總仔，菜總仔華語叫做：蘿蔔嬰，是佇茁穎ínn仔生葉掠外長，佇還袂生菜頭時，歸欉薅來洗清氣，切予幼幼炒蒜頭、薑絲，苦甘仔苦甘誠好食。菜市場真少看到，甘但小農種家己食，食袂完才提出來賣。菜頭是吉祥物，見擺選舉時，電視頂常常看政治人物提一條菜頭手攑懸懸喝中選！中選！伊麻會當變化真濟料理佮食法。做菜頭粿、鼓菜頭仔、用菜礤礤簽曝焦做菜脯米，菜脯乾、、、、。

   記得我細漢時，逐年阮阿母佇菜頭收成時，做一寡菜脯起來，囥咧徛秋時仔若無菜兮時通好食。將歸粒菜頭洗清氣後，用刀子供切予一片一片，用粗鹽搙jiok8軟醃著，隔轉工苴花埕予日頭曝，黃昏兮時，阿母提著竹籠仔來囥咧簾簷跤，籠仔底鋪一層稻草，供曝半澹焦兮菜脯閣撋nuá2粗鹽，一層層鋪咧籠仔內，喝我共跤洗清淨，徛入去內面勻勻仔踏，踏佮看著菜脯汁唯籠仔縫流滲出來塗跤，才會使歇睏。有時準，看著埕尾一群囡仔佇遐咧掩咯雞咧耍，煞無心情，緊用蹔跤步拼生命蹔，不時看塗跤菜脯鹹水有旋出來袂。

   佇庄跤，徛秋時共當仔曝好兮菜脯，趁鮮提來洗洗泡一下仔水，切予一塊一塊，舀一杓仔豬油落去芡蒜頭，共切好的菜脯囥落去炒，欲好時，撒一寡芹菜珠仔佮一屑仔胡椒粉扴keh8味，配誠落飯，麻是囡仔讀冊紮便當的菜配。即馬的人猶較會曉變竅，菜脯切予幼幼煎菜脯蛋，做紅豆仔餅內面包菜脯米仔餡，餐廳的總舖師共老菜脯提來炕菜脯雞，這路菜除了氣味真受歡迎，聽說老菜脯麻會使療傷解鬱喔。