close
雨落遮濟工，氣象局報講風颱欲來矣，愿兜這坵園兮園丁，趕緊提一支鋸仔，扛一支梯，倚佇樹頭，準備欲爬起去共樹椏仔鋸鋸咧，落雨答滴，幔雨幔爬懸，纏跤絆手，袂放心，行倚去共逗扞梯，徛佇塗跤，擔頭喝講踏予好、愛細膩。一觸仔久，共兩欉厝前咧覕蔭兮小欖仁，樹絡刜甲光禿禿，人說：樹大閘風，舊年一欉樹椏傷大葩尾，煞予風颱偃偃倒。厝角頭這欉橡牙樹，葉仔真茂，面頂鳥母佇遐做一个岫，逐日透早，有鳥仔聲「吱吱叫」，叫人起床，若剉樹椏，恐驚無拄好會礙著鳥仔岫，閣予鳥仔囝拍生驚，想想咧，規氣用竹弋仔共拄予在著好，人講樹頭若徛有在，著毋驚樹尾做風颱，風颱抑是覅來卡好，若無連低厝仔麻拄袂牢。
稻仔、果子甲蔬菜是農民兮仰望，風颱若來含雨水，著規个去了了。舊年，厝後園邊一坵木瓜園，木瓜生真厚，真無容易咧欲收成矣，來一个「八八風災」含大水，木瓜欉予風掃甲東倒西歪，農牧、五穀泡水裡，農民干但會使徛踮園頭吐大氣，真正是欲哭無目屎，人講做穡人是靠天食飯。
全站熱搜
留言列表
