（這口灶）有人講是這家口仔兮人，彼口灶，是咧講，彼戶人家，這庄裡有幾口灶？是咧計算規兮庄頭有偌濟戶；這个灶嘛會使講這口灶。
佇我細漢時，阮兜有兩口灶，一个是佇灶跤煮食，一个囥佇間仔，咧煠豬菜、焄蕃薯予牲生仔食兮原子灶；佇灶跤煮飯這口灶較大，中央有一支煙囪管，通好敨火薰，按灶頭拄高懸，迵過厝尾頂；灶面分兩爿，靠壁邊這爿，真大空，囥大鼎，是暗時仔咧燃燒水，予一家口仔兮人洗身軀；佮年仔節仔炊甜粿、糕仔麩；另一爿面，頭前囥細口鼎，咧炒菜，後面囥鉎鍋，用來燃茶佮煮飯。這口灶是阿爸佮做灶師父，用幾落緟兮磚仔，紅毛塗糊的，作灶愛予柴火燃起來會俍風，柴草才燃會著，麻愛煮物件閣會省柴草，遮著愛真工夫，若無是會揣無柴通好于伊窒彼兩个大喙空。
灶跤裡，倒爿下一兮菜櫥，櫥內囥碗公碗，閣一粒貯豬油兮豬油坩仔，壁邊吊一寡煮食用兮鱟桸、戽杓、飯篱、匏桸、佮煎匙。厝角頭桷仔頂懸，閣吊一个崁蓋兮籃層，是咧貯年仔節仔炊兮甜粿、米仔麩粿，囡仔愛揭椅仔跂跤才提會著，是阮這兮囡仔，半晡仔腹肚枵兮點心、四秀仔；灶後，囥兩粒貯水兮大醃缸，水缸水愛逐工去埕尾古井汲，囡仔讀冊轉來愛逗扛水，捥柴縕，將柴縕捥入去灶前，一緟一緟，疊价強欲拄到厝尾頂兮楹仔桷仔，序大人作穡轉來，灶跤才有水佮柴草通煮飯。我尚佮意是佇冬天兮暗時，一家口仔佇灶坑前，大兄二哥會講一寡趣味兮代誌，那烘火那等食飯，寒冷的冬天，無穿裘仔麻感覺真燒烙，這兮時準，阿爸會拿來一寡蕃薯，囥入去灶空內炰，等食飽後，揭火夾佇火烌內，共蕃薯挓出來，愿遮兮囡仔，圍咧灶空前阿爸身軀邊等，「喂！真燒喔，愛細膩。」阮會共燒滾滾，拄炰好兮蕃薯，囥在手中心，那喝燒那佇正手倒手擲換，噘喙歕乎冷兮時，鼻到香貢貢，閣泏糖蜜出來兮蕃薯，予我喙瀾強欲津落來。
即馬佇都市兮街頭巷尾，路邊會看著，一台小型三輪仔車，車斗仔內，囥一兮大粒醃缸，邊仔吊一捾一捾洗好兮蕃薯，烘咧賣，生理閣真好，我有當時仔，會買一條來啖糝；舊年冬天，有一日開車去南洲，路過南洲糖廠，佇遠遠，有鼻到炰蕃薯兮香味，綴著香味沿路踅看覓，原來南洲糖廠內，有一群讀冊囡仔，咧辦活動，規陣人，佇遐咧爌塗窯仔。這兮畫面，紲予我想起細漢時，愿兜規口灶兮囡仔，圍佇灶跤彼口大灶灶前，那烘火那炰蕃薯兮畫面，一幕仔一幕，浮現佇我兮目睭前。
留言列表
