古月金帛 的部落格

   這陣仔運動，有當時仔踅去工業出口區內面行路，路誠直，歸逝路燈光亮亮，未暗趖趖，閣有守衛仔巡視顧門，一个行較在膽。這搭闊莽莽一大遍，佇五、六十年代，攏是糖廠會社兮甘蔗園，臺糖糖廠停止製糖，無閣種甘蔗以後，著共土地租予農民種作。幾年前，屏東縣兮大家長，爭取來遮建設一个加工出口區，歸遍租予人起足濟間工廠，附近兮少年人，有兮來遮上班食頭路，帶來附近居民一寡工作機會，加減附帶來空氣兮污染。

   庄跤兮作穡人用勞動替運動，人講三個透早換一工，熱天透早透晚是農作寶貴時間。五點外仔，定定搪到四、五个騎鐵馬相綴，欲落園作嗇的查某人，面和跤手歸身軀掩甲密喌喌，年齡看來有六七十，in逐日準時上園，庄仔內的人褒嗦講這組是「日本製」；雖然阮無熟悉，毋過，攏會頕頭拍招呼。園面真少看到少年囡仔，我咧想，等遮勻人若退休，園面一寡幼路，機械無法度代替兮工課，毋知揣有跤數也無，按呢種作兮嗇頭，敢會當延續。

     入庄頭轉斡，一坵綠竹仔園，從四、五月開始，逐日透早貓霧仔光，著會看到園主人攑一葩燈火，踮竹仔跤，一篰仔一篰炤咧挖竹筍。佇進前，對遐經過，看到竹篰仔邊，囤一堆粗糠咧漚糞，我共討一寡欲來種花，因為按呢肖捌，原來我愛叫伊叔公，庄頭細，厝邊隔壁牽牽咧攏是親仔戚仔。 伊講：佇肉粽節前後大出兮綠竹筍，咧欲煞矣；竹筍有足濟種類甲食路，麻竹筍、冬筍、烏跤綠、桂竹筍、、、、、等等；綠竹筍肉質尚幼膩閣甜。竹筍欲好食，要落有機堆肥，培土要拄拄仔好，塗下竹目暴穎的所在，離塗面要六、七寸，竹筍才會拄仔好長，這款的竹筍拄仔出塗面袂出青尚好食，尚重要竹母袂使傷櫼，有櫳疏兮空間，發起來竹筍才會大箍。竹筍收成，要佇下晡時仔，先揣便便，揣塗面必痕（pit-hûn5）兮跡小可仔搤開，用竹笒仔佇邊仔做記號，隔日才挖會齊到，若無，透早用燈仔火炤，暗暗看卡袂清楚；竹筍若出塗面見天予出青去，食起來著會苦苦。出一支好食兮竹筍，著愛用誠濟心神照顧。會記得細漢兮時，阿爸佇刺竹仔跤揣竹材料，欲雕牛擔，做牛擔愛用竹頭彼橛，佇竹仔發起來細欉時，著用索仔綁咧石頭，寬寬仔雕，逐工去巡，一日拗一寡，安尼才會當拗出阿爸心目中佮意兮牛擔。

        有當時仔，佇電視抑是電腦看到新聞報導：佇家扶所扶助兮貧兒少中，有四成五課業學習，拄到誠大的困境，七成感覺到厝裡經濟條件，對家己未來發展有限制。根據2011年「貧窮兒少生活趨勢調查報告顯示」，貧窮兒少因經濟環境䆀，佇課業學習拄著誠濟困境，超過七成兮困頓兒少，感受袂到未來。

   散食囡仔，甘但三頓食飯，著發生問題矣，經濟兮弱勢，家庭哪有法度負担會起囡仔課後輔導佮補習費？佇庄跤，有兮若單親或隔代教養，序大人著愛做工，拍拼賺三頓食，無補習兮囡仔轉來，課業拄著問題無好問，序大人無佇咧，歸氣看電視，無著四界賴賴趖，功課綴袂著，去到學堂，老師上課聽無，甘旦神神看烏枋，冊包綴人揹出揹入。政府若無提供經濟弱勢兮囡仔，有一个較平等兮教育資源，『歹竹若要出好筍』是誠困難，希望政府佮社會予怹閣卡濟兮關懷。

     下暗這盤以前佇風颱天菜蔬欠缺的時才會當食到的鳳梨醬仔炒竹筍，彼號氣味，閣一擺予我行入囡仔時烙印佇我記憶裡尚深尚深兮時光遂道。