close
昨瞑,欲倚十點半時,客廳電話一直鈃,等拍精神時,就恬去矣,煞換阮兜頭家兮手機仔咧teh1喨。掠準是逐工透早,佮伊作伙泅水兮查某孫婿明仔早欲歇睏。原來是蹛斜對面的茨邊,做磅仔頭家敲來的。閣眠眠,猶袂回神的我,聽到拄仔才聽電話兮先生,走逐的跤步聲,閣大聲喝喊,我緊行出去看覓咧,看到鵝母,徛咧門口戇神戇神,原來是欲來討救兵的,阮倆个,哪會睏佮毋知天地?遠遠路燈炤來,看著曠闊暗眠摸兮園面,鵝仔毛,落佮歸塗跤,一聲去矣,我想鵝仔家族凶多吉少。先生喝講,全去了了矣,趕欲入來揭手電仔時,茨邊麻行來鬥幫忙。我一時感覺曠野靜寂,歸兮人,按跤尾迵尻脊心,作這的冷起來。燈仔火那炤那揣,佇無仝所在找到鵝仔,一隻是軟跤,身驅躄佇塗跤,袂振袂動;倆隻反肚,雙跤向天,共反過來時,看牠尻脊骿kha4-tsiah7-phiann8 幾落跡受傷,予人看到誠毋甘,真正是抄家滅鵝,為著腹肚實在有過粗殘忍。想講緊來去提紅藥水共伊的空喙抹抹的,茨邊共in4鬥掠來匟咧籠仔內,等三个人舞好,已經十二點矣。頭家講,攏是伊無細膩,今仔日早起放出來工課一下無閒,煞袂記得共亞鉛網仔關倒轉去,好哩佳哉,有這號好心的茨邊共阮通知,若無溫馴的鵝仔,哪會勘得對付彼十外隻粗魯的野狗?
昨暗規瞑到早起一晡,三四隻驚佮攏毋食飼料,看怹敢若受到足大的驚赫,身軀siān -siān 躄著,我想講灶跤猶有一粒黃木瓜切半粒共飼看覓,看牠慢慢仔共頷頸伸咧長長,哎呦!會叨矣啦。
全站熱搜
留言列表