close
最近佮一寡菜友是「種菜」兮朋友，毋是「食菜」兮朋友，因為阮種菜攏是插花仔的，無專業，欲稱做農友有卡歹勢。大家網路討論到台語薅「ㄎㄠ」草，佮剷「ㄊㄨㄚ」草，有甚麼毋仝。我咧講薅草卡輕鬆，剷草卡忝，人生做小粒子，鋤頭比人懸，強欲攑袂振動矣，掘無三下，着怦怦喘；菜友講：薅草嘛無輕可，薅介手痛閣痲，咱兮手毋是葱白，若像薑母頭。我看一下，佇電腦前哈哈笑，伸家己兮手共看覓，我兮手無跤尖手幼，是脯脯，若像雞跤爪。我咧想講朋友兮手，大概是肨奶仔肨奶彼型兮。
有一工，佇圖書館，借幾本仔冊轉來，一本是台語文，今仔開始，看無啥有，餾幾遍了後，感覺誠有意思，尤其是父母以前，逐日佮咱講兮台語話，看着佇冊裡面有遮媠兮文字，予我敢若發現「新大陸」。紲落，着去書局揣台語字典，誠僫揣我欲愛的兮資料，後來請教朋友：欲安怎自習台語文。伊介紹我上網路揣台語辭典，我自安呢開始學習寫台語，那學那寫，現學現賣，希望一日比一日進步。
全站熱搜
留言列表
