今仔日早起，共巡看覓，受傷較輕的，精神有卡好矣，已經正常咧食物件，重傷的鵝公，空喙有卡焦鬆，若像開始咧堅疕矣，一支跤猶咧跛，一直siān7 -siān7攏毋食物件，甘旦叨水，拄著仔會徛起來，斡頭斡耳，猶誠驚赫。想講按籠仔內共放出來，佮彼三隻濫群看覓，in一見面，就kuinn-kuinn叫，閣用喙箍相㧣，敢若咧相問好；khat4一寡人咧食的糙米飯予食的看覓，嘿！看到伊的鵝仔喙罔叨起來啦。
想到今仔發生彼眠，受重傷兮老鵝鵤，尻脊骿彼涵，空喙有五十箍銀角仔的三倍大，濕濕兮血水，空喙見骨，骨下一塊紅紅，敢若傷著脾臟。轉工日時，共抹紅藥水時，伊身軀咇咇掣，我咧想講毋知會感染腹瘼炎袂，茨邊講：這傷痕遐爾重，看起來恐驚袂活，掠去予人刣thâi5刣thâi5咧，若無予死去無彩。
飼精牲仔，對我來講，是無彼號耐性佮愛心的，細隻時，摸著in軟荍荍兮身軀，著起雞母皮；鵝仔大隻，人若行倚去，in著hat hat叫，無膽的我，驚予叨到，麻會一直聳毛管孔；毋知in是佮我打招呼，還是欲共我捅？佇猶分袂清楚時，著起跤走。頭家講：鵝仔兮叫聲，是有無仝的，若侵入伊兮地盤，頷頸毛聳聳，hat hat叫，是咧防衛；叫聲若kuinn-kuinn安尼，是欲討食物件咧共人歡迎。
會記得我細漢時，阿母飼一雞條的雞仔鴨仔，嘛有飼火雞，火雞鵤kak4若展開翼股，就會發出咕嘍！咕嘍的聲音，阮遮的囡子若共創治，in就咕嘍！咕嘍！叫袂煞，火雞仔囝細隻時，誠驚蠓，若毋拄好予蠓叮到，火雞規粒頭，袂輸敢若釋迦咧，阿母著做赤腳仙仔，逐工攏愛共in控臭頭疕仔，閣用麻油抹空喙，晚時，閣愛共弓蠓罩，三不五時仔，拿薟薑仔搢予食，就卡毋驚蠓。雞仔鴨仔若各樣毋食料，伊會誠有耐心共飯窒入去in兮喙空內，安尼營養若有過，就袂餓死矣。
這幾隻鵝仔，是大伯仔的後生，掠一對欲來予in阿叔飼來退休做議量的。無疑悟飼大隻，in蹛園裡，偷偷仔生孵，有一日，阮出國去佚陶轉來，佇遠遠遐，娶倆隻黃錦錦兮囝，搖咧搖咧行倚來，予阮看一下掣咧一趒。
飼精牲，貓仔狗仔若破病，有獸醫共治療；飼雞仔鳥仔，大部份是欲飼大隻通來刣。這陣 飼欲倆个過年的鵝仔，才咧想講逐工見頭見面有感情的鵝仔伴，是安怎哪刣會落手？頭家講：in經過這擺大災難，若醫好無死，會使食咧百二歲矣。
留言列表
