古月金帛 的部落格

   昨欲晚仔，外家孫媳婦敲電話來講，阿姑下昏晚毋免煮，佮姑丈做伙轉來食火鍋。我講逐禮拜攏轉去食飯，食甲會歹勢，孫媳婦講：阮母仔叫妳參姑丈轉來茨佮孫仔作伙食，卡鬧熱，濟人好食物。

   外家大兄大嫂今年八十外矣，有四个後生一个查某囝。外家孫有的年歲咧欲六十矣，有的做阿公矣，四个兄弟仔猶做伙作頭路。大兄的查甫孫、查某孫仔一大陣，若轉去，囡子喙水活，拄到就姑婆長、姑婆短，後生媳婦孫仔猶做伙食，一大內面加加咧貮十外個人，三頓請人煮食，禮拜日煮飯的歇睏，四个同姒仔輪流一禮拜一擺值日，逐兮攏會展出怹的手路菜，有新式的海產料理，有薟椒仔色彩的外省口味，有閩南阿嬤的古早味，四个新婦手路菜料理中，有蘊含in外家傳承落來閣加入家己的新作品，會當唯食物中看到怹原生家庭的生活跤跡。出外做兵、讀冊的囝仔，若攏轉來，一塊食飯桌仔無夠坐，食飯廳貯飯嘛kheh-kheh相倚，誠心適，少年囝仔那食那開講，規桌頂豐沛兮菜，一觸仔久，兩坩火鍋和一鉎鍋雞肉油飯搩甲清氣溜溜。大嫂講：恁兩個人歹煮，轉來茨食飯卡鬧熱，濟人好食物。

   下早仔透早，行出去看昨昏予野狗咬受傷彼隻老鵝公，昨下晡頭家共in飼晚頓時，特別用一寡好料的共老鵝公箍網仔內飼，驚伊搶無食，早起共看覓，規盤飼料猶好好，看到人猶誠青驚，歸工攏毋食今是欲安怎？臨時想到大嫂彼句：(濟人好食物。)心裡想講共放出來予in做伙食，本來連喙都貧惰褫開兮鵝鵤，竟然會相擠搶槽起來。

   記得細漢阮兜，阿母飼一隻豬母，一年生倆水豬仔囝，有一擺生咧十幾隻，細隻食奶，阿爸輪流掠予分伻欶，等到豬胚仔大做伙食潘泔時，豬條內豬仔囝kheh－kheh－kheh，誠gâu搶食，我會定定聽阿爸講：『濟人好食物，濟豬gâu搶槽』。