※三个透早加一工
有強烈大陸冷氣團欲來，氣溫會親像坐電梯安呢直直溜落來，瘦閣薄板兮我，本底著真驚寒，聽講低溫會到七度，心裡先掣咧等。昨暗欲睏時，寮仔
室內，掛佇壁彼支溫度針，猶托咧十九彼格，早起醒來共看覓，是十四度，遮寒，按算下早仔無想欲出門，泡啉一杯牛奶，掩蹛被裡較燒烙，倒佇眠床，拿一本床頭冊，翻開看無三字，心神飛咧一舖路外遠，共冊匟蹛腹肚胿，目睭金金，人神神咧相楹仔桷仔。即嘛草地，是紅豆仔拄矣收成完備，農民趕咧春耕、播田，庄仔裡阿仲，七早八早鐵牛仔聲吭吭叫，駛對阮茨邊過欲去紡田；庄跤作穡人，少睏晏，老阿嬤有一句俗語：「三个透早加一工」。意思是講做三个透早，加加咧，等於加一日兮時間；勤、儉是庄跤人的美德。倒蹛眠床頂，袂輸有什麼物件攪擾，心理煞感覺有一種莫名的躁動，身軀反來反去。
逐工開車去游泳的阮內面彼个，招我作伙去游泳池浸燒水，安呢血路通敨著袂寒，繃絚絚兮筋頭卡鬆冗，想想兮，起來打扮好勢，行出寮仔外，徛佇曠闊的園面，哎喲！阿婆仔喂啊！冷霜風凍筋骨，一、二、三、四穿五嶺衫，三領褲，猶遮寒，趕緊軁入去車內底。坐車內一路上，拄搪做三做二的車輛，猶暗暗看袂清礎，顧講話，無張持煞開過面去，才閣開翻頭，地點佇超市進前，青紅燈倒斡就到矣。
游泳池，是開佇屏東東爿面，建設蹛技術學院校園內，學校正爿一間三層樓仔茨一樓，是室內游泳池，有按摩池，閣有熁身軀的蒸汽，二樓是健身房，這號設備，對會曉游泳的人來講，遮是運動好所在。入去裡面，有一寡人褪腹裼，想講怹哪會遐爾仔毋驚寒。看我這身軀，包甲袂輸若阿不倒仔仝款，這號天氣，欲褪光光，心肝內愛閣誠考慮咧，佮家己參詳了後，冷冰冰兮雙手，實在無彼號勇氣。鼻仔摸咧淺拖仔穿咧，行來歇睏區，坐蹛交椅䖙咧，目睭瞌瞌，按肩頭、雙手放鬆，感受腹肚一噗ㄧ凹，心神專注喘氣，一觸仔久，冷吱吱的雙手，沓沓仔燒烙起來，原底緊繃兮身軀，規個人作一伙輕鬆起來。踏出學校門，心內想今仔日阮嘛有賺到一个透早。
一月十八日
留言列表
