昨日透早猶閣暗暗，一个人騎機車去和成市場款一寡拜拜欲用的物件，早起起床，著想講欲安怎準
備菜碗，愛拜公媽、地基主、還有門口；昨昏外家大兄掠一隻家己飼的雞公講欲予我辭年鬥牲禮，大嫂講先共雞隻洗洗清氣，拍幾粒仔蒜頭、一匙鹽參米酒做伙歸隻挲挲予齊勻，用落去電鍋炊卡省工。想袂到雞仔傷大隻囥落電鍋蓋煞崁袂峇，我看愛閣另外想辦法用大支鍋仔踮瓦斯爐用水煠，煞毋知要煠偌久的時間才袂過火閣拄仔好熟，想到會記得大嫂教講等水滾煠十二分鐘後關火，鼎蓋莫翻予翕，全雞的煮法，甘旦佇清明、七月時仔一年罕咧煮幾擺。那算時間那撿敏豆仔、批花菜，順紲量三觳仔米來洗煮咧中晝拜公媽，時間十二分咻的過去矣，共瓦斯火禁掉。唯冰箱提出來絞肉參麵粉和水，敲一粒蛋、攬鹹汫攪攪齊勻，擠一粒一粒肉丸落去糋，糋敏豆仔、花菜糋；加加咧糋一大桶盤菜碗鬥額，魚、肉、鹹粿、水果鬥鬥咧誠豐沛，十碗拜公媽、五碗拜地基主，過年時仔外面賣便的看起來油肭肭，誠畏。那準備一時想到細漢小叔神子牌仔囥咧地藏菩薩殿，今仔日拜公媽遮鮮操伊煞無食到，想想咧共抾一小盤起來，通好等下小嬸佮怹查某囝轉來乎做伙攢去拜。
公公過往對年後，小叔佮婆婆順紲撿骨，將怹的骨灰共奉佮阿爸做伴。大姆講：「阿爸轉去矣，兄弟仔一人ㄧ家代，公媽隨人祀。」兄弟仔各人共公媽分出來隨人拜，小叔神子牌仔共跋桮允示欲囥咧地藏菩薩殿，按古早例，兄弟分家，家己有囝兒序細仔神子牌仔無愛蹛別人兜。『拜公媽』是囝兒序細對祖先敬念的一種儀式，『過年』是一家團圓的大日子，出外賺食的囝孫，利用過年過節轉來，三支清香蹛祖先的面前向祖先報告、數念，俗語講：『清明無轉茨，無祖；過年無轉茨，無某。』此彥是咧講過年過節佇人民心中的重要性，含有慎終追遠、重視家庭兮意義存在。『一人一家代，公媽隨人拜。』有人解說各自管好家己的代誌，掠準講攏免相交插；伊毋偌是一種傳承，敢有詳細想著：雖然兄弟分家，隨人各自拍拼、發展；樹仔分椏向外伸長，樹根佇樹頭猶原是盤纏作伙，樹兮原頭才是家己永遠的家園。
留言列表
