古月金帛 的部落格

父親的稻草榻榻米106/6/6日

食過五日節粽，破裘著愛放，
五日節跤，天氣懊熱，氣象報導講：閣有梅雨欲來矣。
作穡人趕著採收稻粟tshik。
南風微微仔吹來，吹出齊整的稻稈kuáinn頭，散發稻草的香味。
蹛庄外的孤單徛厝，四面有窗仔門，無裝冷氣、西照日的房間，南風、電風，扇不了燒風。
欲暗仔，供膨床反爿ping2-ping5，舒著床巾，倒佇瞑床頂，汗汁，勻勻仔滲出毛管孔。
想起細漢時，熱天的暗頭仔，阿母會喚我摜一桶水，提布仔濕澹tam5捘tsun7予焦，供眠床枋揉揉的，囡仔人，熱天的暗瞑，睏佇大通鋪的眠床，反倒反落，踮枋仔面頂，焐u3涼。
毋過，到了寒天，寒流hân-liû若來，雖然有舒草蓆仔，蓋綿績被，冷霜風，若親像唯瞑床下鑽入尻脊骿，我的腳蹄仔，還是冷吱吱，反來反去睏袂去，阿母叫我供我的雙跤，軁nng入去伊的大腿縫裡夾著，焐燒，無偌久，小小的跤指頭仔，慢慢仔燒起來。
後來，手巧的阿爸，供四月冬這季的稻草，撿起來曝予焦，捏Liap8草櫼仔， 編出厚厚的稻草榻榻米，舒咧草蓆仔下，寒天的暗瞑，睏咧燒烙的眠床，鼻到彼號清香的稻草香味，
想起一群囡仔，佇機器桶邊，抾起拍加落的稻穗，閣擔兩摠草，転去予序大人绑柴絪，不知不覺睏落眠。