古月金帛 的部落格

「歲頭仔食佮四十九，欲閣生一个囡仔房內吼。」阿母共伊講：彼年一日下晡，食中晝頓後，伊共阿爸講：今仔日欲晝tau3仔時，腹肚感覺陣陣仔疼，若親像囡仔欲出世矣；我共遮的鏨tsām4好的豬菜佮蕃薯囥入去大鼎煠，你緊去請大鼻婆來。阿爸一時張持一觸仔久，感覺毋好勢，佇心理咧想：食到這號歲頭仔，棺材軁一半矣，閣欲生老囝，实在是見笑代。咧想毋知欲按怎去共大鼻婆仔開喙。大鼻婆仔是村仔內的長輩，會曉共人抾囡仔生囝，是福來仔叔的老母，大鼻婆仔佇我會曉行路四界走的時，猶捌看過，in蹛佇阮兜埕尾路邊彼欉楊桃閣過去，迵過一條牛車路的彼爿面。阿母講彼當陣的人毋捌，麻袂曉節育，囡仔一直生、一直生，會生生佮袂生，若生到查某的，序大人著講：要生三兮查埔欸！扞草繩仔機，草繩仔才拍會起。庄仔內，有五十二歲生囝記錄，真正是阿母𤆬囝兼𤆬孫袂了工；麻有叔孫仔仝日生，大家、媳婦仝月同齊做月裏，是四常兮代誌。彼當時，醫療無普遍，攏是產婆來厝裡接生，生囡仔真危險，古早人說：生贏麻油酒香，生輸四塊板，用生命咧跋，準無講是歲頭仔遐爾仔濟，有一句諺語：阿婆仔生囝誠拼咧，道出彼當陣兮醫學欠缺，生老囝的危險性。

阿母講：時代無仝矣，即馬的人生囝，攏去病院婦產科，有醫生真好的照顧，毋拄好若生袂出來，閣會使開刀、剖腹肚；麻會使請老師選一个好時好日、定開刀房看時辰生囝。愛媠的媽媽，無愛飼母乳，就叫護士來注一支「退乳針」，講什麼予囡仔欶乳，以後奶會倒垂，身材會䆀bai2去。阿母講：人若老，逐項麻攏會倒垂。

記得我生頭胎時，阿母陪我去病院，醫生叫我佇產房外行踅、運動，安尼會卡好生，當腹肚咧陣疼，疼佮擋袂牢時，我雙手用力搝咧矮細阿母的手股頭，喘大口氣大聲哼時，阿母將喙㧣倚來我的耳空邊，講：真疼乎？略仔吞忍一下，不好哼㣛彼大聲，會予人笑。