風颱翻頭，昨暗，規瞑風佮雨，一陣仔一陣，咻咻叫，予人睏袂落眠，倒咧眠床，反來反去，目睭金金，相桷仔，崁亞鉛鉼兮茨頂，劈劈擗擗落雨聲，一時感覺噪人耳。摸床頭目鏡，檯燈捘開，紲手捎一本冊掀開，嘛毋悉也佇甚麼時準乎眠去，眠眠聽到里長伯仔熟悉兮機車聲，噗噗叫，逐日透早五點，是伊欲去落園割蕃薯葉兮「報時聲」。 起床坐踮電腦前戇神戇神，敢若猶閣咧陷眠，洗好面，擗開電腦拍字，無若久，天色光矣，想洗一觳米落去煮糜。擢開門簾仔看覓，風勢伽小矣，猶小可仔霎雨，窗仔前，旋咧含笑花欉兮新娘花，葉片滿滿是透明雨珠，看來若像真珠、鑽石遐爾仔媠，佮桃紅色花蕊，綴風搖咧搖咧，規欉共看起來，袂輸聖誕樹「燈光閃閃」，紲手提相機來共翕相，仝款是藤蔓旋藤植物，伊兮葉仔特別青翠，彼款纖弱溫柔、浪漫兮姿態，輕輕仔幔咧含笑花欉，誠驕媚。我特別佮意，想起來，若無記毋到，時間相隔應該有五十幾年矣，論真講，愿會使得講是久別兮朋友，閣來相逢。
風颱過後，庄跤空闊兮呼喝，予勼佇茨內兩工兮勁骨，想欲共搝搝咧，近半晡，行佇田園小路，雨後黑陰天，感覺秋凊。兩人踅對庄頭兮西爿面，拄到祖茨茨邊朋友，伊是佮大山作伙大漢兮囡仔伴阿財，阿財佮怹某，佇園頭咧妝拄矣挽起來兮匏仔，三、四籮滇滇，伊講：即嘛價數誠好；拿三條送阮，「盛情難卻」。轉來，中晝頓共匏仔皮剾剾咧，用菜礤礤簽，摻一寡麵粉，敲一粒卵，下一點仔糖、鹽，攪攪拌拌齊勻，囥油落去煎「匏仔炱」，煎咧兩盤，鼎底托起來，加一點仔豆油膏，趁燒燒食，軟㽎㽎，滑溜仔滑溜食到誠紲喙。
記得以前庄跤，雨天農閒時，扞鼎灶兮查某人，煮食誠會曉變竅，怹佮茨邊隔壁，同姒仔相招，隨人各自去米甕量 一升 米、黃豆。作伙做豆腐、做觳仔炱，共米，黃豆洗洗咧，囥水落去浸好，摜去間仔簾簷跤，用石磨仔挨，轉來，共做豆腐濾起來兮豆粕，毋甘拍損，濫久菜作伙，囥落去米漿攪拌，糝鹹汫，用泔杓一匙一匙，舀落去鼎煎，煎規桶盤，食起來，赤嗲嗲閣芳兮觳仔炱，是做嗇人落雨天兮晚頓。
留言列表
