早起，騎機車去住家北爿面兮「和成市場」買水果，款一寡拜祖先、普渡的物件，入市場，挨挨陣陣兮生理人，來遮販貨，遮个市場，是對以前的「賊仔市」徙來兮，因為是批發，物件有伽俗。最近大雨加颱風，蔬菜水果受損害真嚴重，逐項物件攏起價，夭壽貴。
欲晝，款好欲拜（公嬤）兮時，聽到外面有人咧喝咻叫我，出去共看覓咧，看到「阮內面彼的」，伊兮手裡，攑一支火夾，挾一隻大箍鳥鼠，已經死矣，講是予電動門挾到尾溜，哪會遐爾仔拄好。這一陣仔，定定落雨，大慨是鳥鼠空踮袂牢，還是半瞑仔出來討食，寮仔內兮蕃薯、水果，天光起來，就看到予鳥鼠挖一空、食去，予阮兩个睏醒起來看到，真正是規腹火，提一个鳥鼠籠仔欲來共搪。
擺好菜碗、供品，兩人攑香，共祖先敬拜了後，看「阮內面彼的」，坐佇椅仔愖愖，誠久毋講話。敬酒三巡，跋象桮，我咧收供品兮時，伊開喙講：感覺誠奇？開電動門，是無定時，鳥鼠哪會遐爾仔拄䢢，早毋過，晏毋過，拄好電動門關、開兮時，趖過來予挾到，是毋是爸仔轉來，知影咱咧困擾所以、、？。我聽到，斡頭兩人四目相相sio－siòn，我順喙講：哪有可能？你莫〈栽贓〉予老爸仔，兩人想到共同兮記億，目睭相相，煞看伊嚨喉管滇目箍紅紅笑出聲來。公公在世兮時，有當時仔，會入去果子園踅踅咧，遮摸遐摸。記得進前，阮內面的，佇園邊種幾落欉，按朋友遐提轉來兮椰子栽仔，有一工，發現乎人薅擲捒，下踮邊矣。遮奇，園四箍輾轉攏亞鉛網仔圍著，啥人遐呢仔無聊佮好膽共薅掉；閣來懷疑我，問是毋是我共椰栽仔當做野草薅掉。我說：我毋捌食豬肉，嘛捌看豬咧行路，哪會毋捌椰栽仔生做啥款，我雖然卡少做穡，細漢嘛是佇田庄跤大漢的；兩人入茨內閣咧爭論不休兮時，老爸仔聽到，坐佇椅仔遐文文仔笑講：『椰仔栽仔是「我」薅擲捒的』。紲落閣講：『你即嘛攏欲六十歲矣，等椰仔大欉生兮時，你着老矣，我驚你到時peh懸peh低挽椰危險』。阮兩人相相，我講：老爸你尚大，共椰子栽仔薅起來，伊攏恬恬，拄才誤會我共薅椰仔，閣氣怫怫。
序大人疼囝、關心囝兮心，毋管怹是歲頭偌大、偌老，這予我想到一句俗語：『爸母疼囝長流水、囝疼爸母樹尾風』。做爸母的，對共囝仔生落來了後，按出世搦屎搦尿，若食大小頓，頭燒耳熱，着袂食袂睏，透冥傱去撞醫生館；教育費，按幼稚園到佮大學，開的錢，疊疊咧，比人伽懸，閣操煩怹揣頭路、娶某、嫁翁、生囝、、。
留言列表
