下晡烏陰，一大片兮黑雲，氣象局閣報講，風颱欲來矣，園丁夯梯，作伙準備欲落去果子園巡巡咧，伊攑來幾支杙仔，共釋迦佮林菝仔欉拄着綁樁。捎一疊套橐仔，欲共指頭拇公大兮林菝仔穿衫，菝仔粒懸懸生誠厚，提一條椅仔跂跤，伽四是，袂堪得頭擔傷久，若無，這把老骨頭是會散去。那包那相，看到一粒夠分的林菝，紲手挽起來，蹛衫仔裾尾拭拭兮，窒入去喙空囓，菝仔細粒，哺着閣摳摳叫，有機、無農藥兮蔬果，愛包、用精神照顧，愛予虫、鳥仔食賸兮，雖然看肖䆀，毋過，食起來口感無仝，伽實腹。顧食，雄雄聽到雷公聲，攑頭一看，天黑雲罩，隔壁北爿園，一遍控闊，佇樹仔跤，烏天地暗，感覺誠恐怖。一觸仔久，雷公爍爁直直來，喝愿兜園丁：好歇睏矣。我椅仔提着，摒起跤做前，半行半走傱輾來厝。看南爿一坵九層塔園，大概欲趕佇風颱前採收，農民繼續拉著割菜機嗡嗡叫，踅一逝來一逝去咧趕穡頭，敢若無聽到咧霆雷公，替怹介緊張。
佇記憶内，嶄然仔深兮是，國校畢業彼年歇熱，佮三兄綴大嫂、貳嫂，欲去溪埔蕃薯園，鬥捎蕃薯藤，彼下晡，落園作工課時，拄䢢來一陣大西北雨，一時黑天地暗，雷公爍爁喀喀霆，我迸矣，緊綴三兄摒起跤走，傱去園拄頭，軁入去別人兮牛車跤覕。大嫂講：這陣雨，凡勢會落袂停，叫阮跤踏車牽咧，緊來轉。一路搢風嗾雨，目睭霧嘎嘎褫袂金，十里外遠路途，忽然間，感覺騎誠久，騎袂到厝，三兄跤伸咧，拄佇我兮車後架鬥捒。到厝門口埕，看到阿母徛咧簾簷下，目箍紅紅咧nih、nih看，問伊是安怎，阿爸嘛拄好按鐵支路邊兮菜園，空手輾來，講伊共鋤頭，抨踮鐵支路邊，講話時誠緊張。原來，庄仔內，有兩个有相捌兮查甫人，佇田予雷公摃到，一个是阿母兮後頭親，有某囝，囡仔還誠細漢。
最近看氣象報告，定定聽播送員強調：有雷陣雨，空闊兮所在愛細膩。有一擺，我問庄內作穡兮工人：『佇園拄着霆雷公兮時，哪毋緊走』。她講：『做工，頭家若無叫妳歇睏，走轉去，工錢欲找誰提；伊甘焦會使徛咧田中央，雙手合十，祈求觀世音佛祖照顧賺食人』。聽起來心內誠酸痛，予我想到一句話：「恁若會毋食滷肉飯」。敢若袂輸講我毋知影做工人兮甘苦。
坐踮寮仔內，看到雨，一陣比一陣大，金爍爍兮爍爁，想攏無，我安怎哪會彼呢仔驚霆雷公？四、五十年前，阿母徛門邊，目箍含目屎彼兮畫面，浮現佇面前。
留言列表
