close
這月日，是舊曆七月，毋管是廟寺，還是人家茨前門口埕，有時會看到擺佮誠腥臊閣豐派，欲來敬拜中元公合好兄弟。轉來故鄉，咧欲六年矣，這幾年，會款寡焦料，參加社區超峰寺贊普、鬥鬧熱；這過，我頭一擺參加這號公普祭典，看到來參加兮，大部份是老歲仔。
這陣老人有的歲頭七、八十矣，身體看來猶誠康健，即馬嘛無店仔頭好坐，踮茨坐晝坐暗無議量，廟埕榕仔跤，是怹的「俱樂部」。今仔日，社區普渡，少年人出去做穡、上班。遮的老人佇儀式裡，一點仔著無凊彩，即馬，咧宣導環保救地球，覅燒金紙；怹講：金紙燒卡少，毋過，「經衣」袂使無，「經衣」要佇燒頭落香了後著要燒，欲予遐的好兄弟穿媠媠，來食腥臊；桌面兮供品上，逐項著愛插香，安呢叫做「孝孤」，意思是對好兄弟兮布施敬意佮感恩。請來兮唸經團，誠恭敬咧唸經，大家綴拜，等三落香儀式袂煞，唸經團兮主持伸手，共桌頂一盤一盤的糖仔、紅龜、糕仔餅、銀角仔，一搣一搣，往半空掖落佮滿塗跤；我看起來誠袂慣勢，我心內咧想：欲孝敬孤魂野鬼，欲乎好好仔食一頓矣，坐咧敢無卡四是，敬品規桌，遐爾仔豐沛，有桌仔無椅仔，物件閣用掖的，敢講「好兄弟」有的傷閉思、卡細膩，掖四散會卡公平。世俗人，無看到，嘛毋知影「好兄弟」有來領受無，佇儀式中，看到遮的七、八十歲兮老人佮囡仔，逐個佇遐跍起跍落，抾紅龜、銀角仔，抾佮遮爾仔歡喜；佇這人情味，愈來愈薄矣兮時準，庄仔內人出來「公普」，作伙聯誼，老人、囡仔作伙這號活動，看起來閣誠溫馨。
全站熱搜
留言列表
