年前，幾个朋友提義講：「咱誠久無見面矣，春假歇睏遐爾仔濟工，大家測出閬縫的時間做伙來食飯。」查某人平常時茨內十差仔工課濟較無閒，利用年假鬥陣，逐个e5攏真讚成，只是過年前愛款年貨，準備拜公媽、地基主、辭年，除夕閣攢tshuân5一桌腥操仔腥操，予出外賺食轉來的人佮一家大大細細作夥圍爐、團圓。逐家佇網路參詳時，有一个朋友講：初三袂使，in7兜的姑婆欲轉外家，今年輪到伊招待。
按照台灣習俗，出嫁的查某囝佇 農曆正月初二 會轉來後頭茨作客；阮這个朋友今已經做阿嬤矣，in姑婆的歲頭仔算來麻袂少，這个姑婆佇頭毛白se-se時，外家孫仔、孫新婦款待，予伊猶有後頭茨通轉確實是一件非常溫馨的代誌。予我想到以前捷捷聽到長輩講：有爸有母初二三，無爸無母頭耽耽。這是爸母猶閣佇咧；若是爸母無去矣，轉外家的機會huē7會較罕咧。姑婆算起來是阿公的大姊小妹，伊唯爸母、妗仔兄嫂、到孫媳婦，維持這號親情毋偌是一代爸母二代妗仔兄嫂爾爾niā7-niā7。我咧想到俗語：爸母無佇，嫂若娘，若ná爸相挺，是大兄；阿姑疼孫，仝字姓，姑婆猶有，初二三。查某囡仔唯嫁出門三日轉茨開始，後頭茨是in另外一个倚靠的家，也是in不時數念e茨，。
記得生頭胎時拄著寒人，當當tng-tong時我猶咧外家的庄內經營查某囝仔時著開業的時裝店，翁婿頭路咧他鄉外里無佇身邊，囡仔欲出世彼个透早四點，腹肚陣陣仔疼，我彼个拄仔咧讀護士的查某孫仔醒來，緊拿手錶仔來量時間作實習，算看我腹肚偌久陣疼一擺，嗯！阿姑，三分鐘一次無過捷；阿母講頭上仔卡慢，緊叫媽媽去灶跤燃一鍋燒水予恁阿姑洗頭毛，生了後月內人一個月袂使洗頭，若寒到會致月內風。天袂光阿爸喝三兄起床駛車載阿母陪我去基督教病院，佳哉有後頭茨爸母兄嫂相楗，等翁婿請假轉來到茨，囝仔已經順利出世矣。
隔轉年翁婿工作調動，綴伊搬離故鄉到北部食頭路，會記咧今仔搬去北部彼陣，人地生疏，有當時仔心情鬱卒，想茨的時，著搣幾箍銀角仔去敲公用電話，只要佇電話彼頭聽到阿母的聲音，心情著歸个輕鬆起來。彼當陣猶袂起高速公路，交通無方便，阿爸講：台灣頭到台灣尾路頭偃起來拄天，欲看查某囝攏真難得。我第二胎有身時，人說：頭胎二胎食外家，阿母就飼一陣土雞仔欲共我做月內，查某囝出世時，阿兄開一台箱仔車，載一籠仔雞，和阿母搬搬搖搖，唯透早駛到下晡，袂堪得長途撨摵的雞僆仔，幌到桃園煞規身軀軟荍荍袂振袂動；阿毋和阿兄一點仔都袂喝忝，無偌久，麻油酒雞的香味衝tshìng3入來月內房，人講手抱孩兒才知爸母時。爸母疼囝長流水，攏嫁出門矣猶替咱操心，若手指頭仔親的兄弟姐妹情，麻是陪咱一世人的親人，有in 永遠的支持；後頭茨毋偌是查某囝尻脊後的精神倚靠，也是能量泉源。
留言列表
