祭兄文
我敬愛的阿兄，你加我二十歲，雖然我叫你阿兄，毋過，你疼我的心親像咱的老爸。
阿母生咱兄弟姐妹頭喙濟，阿爸干但做彼塊米母仔二分地，阿母勤儉扞咱這個家，厝裡散食，咱的生活麻無好過。
阿兄: 我常常聽過你講的一句話:「家用長子，國用大臣，大囝是厝牚thènn3」。做為大囝的你，想欲擔起這個責任，tshuā7著二哥仔，鐵馬騎咧，做伙去賣魚做生理，一家一戶四界踅、四界賣，辛辛苦苦為著幫阿爸逗維持這個家。
記得我細漢時，看到囡仔伴有錢買四秀仔，我吃飽晝，著蹛咱兜的門口埕彼欉榕仔跤一直等，等阿兄你騎鐵馬載魚箱仔轉來，你無掛食飯，著供吊佇車手扞咧找零星lân7-san8 錢的鐵盒仔摜落來，算看今仔日趁外濟，
阿兄: 我尚愛聽你唯鐵盒仔倒出來鈴喨叫的銀角仔聲，我徛倚去，你著提兩角銀予hōo7我，我手扲（gīm7）著銀爍爍的兩角銀，那行kiânn5那走tsáu2，走去仙進伯的柑仔店kám2-á2-tiàm3，買我尚愛抽的黑馬佮白馬；手氣若好，會使加食咧幾落塊。你予我彼號甜蜜的感覺，雖然過了五十外冬矣，即馬還留佇我的心肝底。
阿兄，你閣會記得嗎？我細漢時，逐年的農曆二月二二日，定定綴阿嫂轉外家，彼工是阿嫂後頭厝庄仔裡彼仙廣澤尊王生日兼做清明，辦桌請人客。你要賣魚做生理，袂當陪阿嫂轉去，阿嫂共阿母講叫我陪伊做伙鬥tshuā7囡仔，透早阮相牽一摜，唯咱兜愛行三里外遠才到加禮濫。我尚愛去親姆in7兜，去廟埕看大戲佮布袋戲大車拼、買我尚愛食的鳥來仔糖，廟埕規日鬧熱滾滾。欲晚仔，後擴āu7-khok4用紅紗線髻kuè3一個龜仔頭鬃、瘦瘦躼躼lò3 - lò3，笑起來面攝襇liap-kíng2的親姆，捧一面桶水佮低椅仔來埕尾予我講：「阿姑仔，緊共身軀洗洗咧欲食飯矣」；這時，我看你唯外面騎著做生理彼台鐵馬來到親姆遮。彼晚，桌頂辦甲誠腥臊tshenn-tshau，我食甲飽歪歪。晚頓食煞，咱這台後架kè3真大的二八仔鐵馬，後面載阿嫂，她一個抱、一個偝 āinn7，復肚裡閣有袂出世的阿益，我坦敧身thán2-khi-sin軁nng3入去坐咧阿兄跤踏車的虎骨頂，春天的暗暝，騎佇長躼躼lò3人講竹竿庄的社皮路，風微微仔透，我頭頕咧頕咧目睭一直沙微，敧khi咧阿兄你的手股頭，你喝一大聲講：「阿妳咧盹龜tuh-ku喔？」予我雄雄hiông5-hiông5掣tshuah咧一趒tiô5，醒來一支跤煞麻去，目睭擘金peh-kim才發覺我的木屐bak8-kiah8減一跤，我大聲喝：「阿兄我的木屐落落lak-loh8去矣」，你手扞一擋停落來，鐵馬騎翻頭轉去，咱延路踮暗暝摸的土跤揣tshuē7木屐。阿兄，這個畫面這幾工常常佇我的目睭前踅來踅去。
你二十八歲彼年，兵役課的兵單來，欲抾khioh你去做兵，記得你欲入伍彼日，阿爸請來一台三輪車來載你，我看到阿嫂目箍紅紅，阿母覕bih咧門後探頭流目屎,印象留佇我記持內尚深是阿爸送你出門時，坐踮三輪車頂的你，三輪車那na2行，你na2越頭，彼當陣我八歲，拄仔欲入學，毋過我感受到咱阿爸忽然減少一支手骨。你一出部隊，就被征去金門大擔，彼時陣拄仔是八二三炮戰後，有一日你寫批轉來欲討厝內人的像片，阿爸請來一個翕相hip-siòng3的，三跤馬頂懸掛kua3一個四角觳khok仔，用黑布崁khàm3著，咱兜門口埕椅仔干焦kan-na坐阿爸抱阿益、阿母身邊攬阿茂、阿蓮、大我兩歲的三兄穿國校卡其服徛咧阿母的身邊，我咧想，大概四角觳khok仔傷siunn細，若無阿嫂、阿姊、二兄、佮我若攏無翕。阿兄，咱兜厝內，阿母飼咧抾khioh潘泔phun-ám2彼隻豬母生的頭水豬仔囝，本來留豬胚phee，按算欲弓大豬，弓大豬愛下重本，食蕃薯配豆箍，咱無本錢，致使買蕃薯著共人賒欠，年兜欲到，蕃薯販仔來收數時，我看阿母一直為著共人限數ān7-siàu3坐tshē7歹勢。我畢業後阿母tshuā7我去學裁縫，看到同年的去學墊豆仔、播秧仔，共序大人鬥趁錢，我想輸人毋輸陣，緊請阿嫂幫我揣墊豆仔貿頭允工課khang-khuè3，農曆八月十五彼日，透早四點袂到，阿嫂起來煮早頓時，我著起來準備穿手囊tshiú2-lông5、縖ha5徛罨am、掩om面巾、瓜笠仔戴咧，十六歲的我，跤後肚無肉，徛罨am縖ha5咧，袂輸狗仔咧囊火籠，阿嫂提來兩條綿繩予我縖ha5，興頭上，歡頭喜面帶著阿嫂替我傳的飯包，佮怹出門，一陣六個人跤踏車騎相綴，貿頭講我這個囡仔庇騎頭前，若無會散群去，唯咱胡厝騎欲往頭庫厝的陳厝庄內越轉角時，佮一個趕欲去溪埔挖蘆筍的阿桑相碰、跋倒pua̍h8-tó2，跤頭趺摖破皮liù3-phuê5， 腳踏車偃起來煞落lak輪，輪框歪斜袂振袂動，貿頭叫吸仔舅載我，伊大我十三歲，三十袂到體格當粗勇，毋過，我坐咧後架聽會到伊用力踏tap8腳踏tah8仔的喘氣聲，真無容易經過基督教病院北爿面的火燒客家庄外，田頭家載一袋花豆仔子來囥khng3踮田岸頂，交代講：遮的五分六，一分五十箍。六個人一字排開，每人雙跤，迒hann7五個稻稿ko2矛moo5頭為一逝tsuā7，我頭一擺作工，挖仔下生命挖，下生命逐jiok，還是押後，手中心膨疱phòng3-phā 7。 下晡四點外，工課收煞，頭家提來現金予貿頭，大家開始算數pun-phenn，我看到紅紅的銀票真歡喜，貿頭抽十箍予我，賰tshun的in五個人分伻，每個人分五十四箍。轉來到厝，我憤憤不平共阿母講，阿母講：「頭仔咧學，趁少錢無要緊啦」，阿兄你聽到對我講：「裁縫認真學較實在啦，人若欲做牛，免驚無犁通拖」。這句話我聽入去，十九歲彼年，我佇菜市仔邊租一間厝開時裝社，做裁縫老師教學生，家己會曉趁錢閣去讀暗學仔àm3-o̍h8-á2，這攏是受到阿兄佮時裝社厝頭家的後生昆永哥仔的鼓勵，才有今仔日的我。
阿兄，自阿爸阿母過身了後，有人講：「死爸路遠、死母路斷」；毋過，我感受的卻是古早人講的「一代爸母、三代妗仔兄嫂」。彼當陣，四十八歲才有我的阿爸，佮我一萬三千一百外個日子的父女緣；四十歲才生我的阿母，一萬六千七百九十幾個日子母女緣，綴跤尾紙的燒煙摻咱的目屎來離開。失去爸母的我，有外家兄弟佮妗仔兄嫂的陪伴，遮我點滴佇心內。阿兄，咱細漢時雖然咱家內散食，毋過，爸母予咱的是溫暖的家佮愛。亦ik8兄亦ik8父的你，佇今年四月身體欠安，原底認為尿道結石仔無大礙，住院檢查後是腰子感染出血，有糖尿病的你併發胃大出血，本來你歡喜手術後治療好起來，欲參加你的查某孫仔家瑩的婚禮，醫護的疏失致使失血缺氧而昏迷，煞蹛入家護病房，兩個外月來，囝孫的探望，唯踮病床陪伴阿公有講有笑到甲你不知人。阿兄，你的病痛，看咧大家的目睭裡，是非常的毋甘。阿蓮目屎四瀾垂對我講：「阿姑，阿爸真疼我，我真愛阮阿爸，阿爸若離開，我會毋甘；毋過，做一個醫護人員查某囝的我，閣較毋甘阮阿爸逐工留蹛家護病房，面對遮爾仔冷冰冰的醫療器材折磨，一禮拜閣愛洗三擺腰子來維持他的生命，我共我的阿母講，我佮哥哥以及三個小弟參詳，想欲共阿爸的管拔掉tshuā7接轉來厝」。阿兄，阿嫂佮你後生查某囝做這種萬不得已決定。
阿兄，救護車送你轉來到厝彼工，你雄雄喘一個大氣，面容安詳無閣目頭結結，咱的宗族仔、厝邊好友大家攏來看你，囝兒媳婦、孫仔攏佇你的身邊陪你，你雖然昏迷毋知人，神識敢若還有感覺，遠路的外甥、姪仔轉來看你、叫你，你會流著目屎。進前逐工陪你看電視的阿嫂，農曆五月二四日欲晚仔，喉滇âu5-tīnn7流著傷心的目屎共你講：「咱結婚到今已經六十年矣，若是緣盡，我毋甘看你佇遮受病苦，你萬項代誌著愛放下，綴咱兜供奉的媽祖去修行」。彼暝十點二十五分你來辭世，阿兄，你我兩萬三千一百幾個日子兄妹情緣，怎叫我袂喉滇。阿兄：今仔日是民國103年6月30日，是你的告別儀式的日子，你的人生任務，已經真成功完成矣！你的囝兒媳婦，麻有維持î5-tshî5著你的理念，攏真打拼合作，孫仔輩一家大細攏真捌代誌，對阿嫂麻真有孝，你著放心，放下人間的種種掛慮，好好綴tuè3著觀音佛祖去修行、聽經聞法嘿。
留言列表
