close
收驚「金木婆亅 2013/5/12生活筆記
人講竹竿庄的社皮，包括社上、社中、社皮、社口、加禮濫規條龍，若講到金木婆，無人毋捌伊。 金木婆生做矮肥矮肥，伊的穿插頂懸是藍色的大襟衫，下配黑色大襠褲。
聽講in規家是按頂港搬來南部，蹛阮庄已經幾落冬矣，講話彼號北部腔口猶真重。
佇醫學普遍缺乏的五十年代，厝內嬰仔若搭嚇tah-hiannh吼袂煞，序大人會憢疑giau7gi5的確是拍著驚，代先想到的是金木婆。胡厝宗族內囡仔一大陣，向時人伊麻是胡厝的常客。
一擺，阮兜姪仔受搭嚇yah-hiannh，規瞑毋睏嘛嘛吼，隔轉工，阿爸去請金木婆仔來。
金木婆出門收驚攏佇暗時，會請伊佮阮做伙食暗頓，食飽後，歇一觸仔久，伊喚阿嫂提一領嬰仔平常時穿的衫，一塊碗貯té一碗白米，伊供衫蓋咧彼碗貯滇滇凸凸的白米頂懸，包密密，將碗面倒匼tò-khap，踮桌面來回供米摸平，了後，燒香敬拜大廳的神明，請神降臨收驚。伊用客家語唸一大摜我聽無啥有的咒語，內容有一段：bin tshiong-tshian（眠床前）、bin tshiong-huo(眠床後)、
lai-siu-khohg（來收驚），thong kong-thong phoo(床公床婆）lai-siu-khohg(來收驚)mooh-khong-moon-hah （無驚無嚇），
lai-la（來啦），San-hun-tshit-phiok，thuan5-lai5-8hann7(三魂七魄，轉來啊！）
嬰仔抱佇序大人懷裡，惦靜惦靜，兩蕊目睭綴她揮舞的手，忽懸忽低。收驚煞，她將衫慢慢掀起來，研判著碗面米粒的變化，大家上前看彼碗面的圖像，伊講：嬰仔是予狗嚇驚到。隨後，將蓋米的衫，予嬰仔穿身軀，嗯！好睏好安眠。
人若食老，卡想攏想過去。已經過了一甲子矣，我即馬想起來，金木婆仔的咒語唸歌，腦海中浮現岀這个畫面。
2018/5/20訂正
全站熱搜
留言列表
