蕃薯毋驚落塗瀾
雨落煞，較早起床，欲共拋荒兮菜股整理理兮，趁塗面澹澹，塗鬆軟，薅草省氣力，連鞭日頭若出，赤焱焱，足鑿目，汗水滴落目睭是出火金星。
透早薅草，烏蝛仔濟，踮身軀邊颺颺飛，面若掩無密，喙䫌、額頭連鞭叮咧幾落噗，無想欲一透早開殺戒，煞予in食早頓。天袂光，蹛庄內駛鐵牛仔兮阿仲兄，鐵牛聲噗噗叫，對厝前經過，這站仔，拄著落大雨，做嗇人進前掖兮九層塔、芥菜，菜嬰仔，嗾雨了後，日頭出來一熁，規坵菜，黃黃蔫蔫毋成物去，田愛重紡，鐵牛仔一坵一坵共作田人心血綴咧紡入田塗裡，敢講這算『做着歹田愛望後冬』。
才閬月外日，野草發甲滿四界，一支新的割草刀仔猶袂出手，看到ㄧ欉見笑草，覆咧塗跤，籐湠五穎旋尺外長，用手共動看覓咧，伊的葉仔，連鞭虯虯頕垂閉思閉思，看起來誠心適，毋甘給薅挕捒，提一个花坩來徙栽，準備三不五時仔，通好共創治。進前墊兩稜蕃薯，共摒起來，生幾條仔拳頭母大兮蕃薯，規摜若手指頭母公兮蕃薯囝，作伙放予拋荒。想袂到蕃薯稜彼搭，煞生湠歸遍的蕃薯藤，野草來佮伊爭地盤，無共看顧，發遮茂。想起一句俗語：『蕃薯毋驚落塗爛，只驚枝葉代代湠』，這款兮生命力，毋管是啥款環境，伊兮韌性、生湠，臺灣人定定形容家己是蕃薯仔囝，一點都無毋到。
蕃薯佇五、六十年代，是豬仔兮飼食，嘛是散食人兮主食，飯坩掀開，生鍋裡，滇滇蕃薯簽，蕃薯飯緊枵，愛食幾落碗才會飽；記得細漢時，半晡讀冊轉來，腹肚若枵，著走去間仔，提椅子跂跤，夯一支大煎匙，靠咧灶頭，挖鼎底崁佇豬菜下兮蕃薯，共皮剝掉，搵一點仔鹽，佇無四秀仔通食的囡仔，是上好兮點心。
佇徛秋，抑是風颱兮季節，四常落雨，搪當佇蔬菜浸爛死死去時，蕃薯葉仔，就是「物美價廉」兮菜蔬。規年迵天有生產兮蕃薯，確實是：時到時當，毋米閣有蕃薯箍湯好食。
生活綴咧改變，一寡有歲兮老大人，講著早前，蕃薯予人食佮厭青驚。即嘛，食食富足，大魚大肉了後，會想到買粗俗兮蕃薯來治便秘。莫怪，定定聽序大人咧講：『蕃薯救人無功勞』，是咧講蕃薯對臺灣人貢獻誠濟，若無蕃薯，人民早著肌荒枵死矣。即嘛，根據專家研究，加食蕃薯，有益人體健康；蕃薯葉仔，有助抗氧化，是現代人兮健康菜蔬。發規遍，茂閣媠兮蕃薯藤，拄好薅來剁幼幼，好濫落去新鮮果皮，做環保酵素來救地球，愛留一寡通好作種，地若整理好，打算共墊咧予怹枝葉代代湠。
留言列表
