close
更正台語
生活筆記
昨晚欲11點，倒咧眠床，不時徒跤脊骿，睏袂去，誠久！誠久～。
雙手用力撐著腰移動腰脊骨，
| 半䖙倒，打開床頭電火，順手翻開册，看無幾頁，目睭皮開始倒垂，那睏那眠夢，敢若看到你行路的背影。 自我捌代誌，你歸年迵天穿着仝款的布鞋仔， |
，毋捌看過你穿木屐佮淺拖仔，你的跤，有一個真大的堅疤，穿軟底布鞋，你的跤行路會卡四序su2-si4。
聽母親說：佇我猶袂出世的彼一年空襲時，你的跤盤生一粒水疱pha4，用手供擠破，煞感染發癀hông5腫歪歪。阿母𤆬阿兄、阿姊覕bih防空壕，炸彈聲隆隆叫，你無法度看醫生，一个人倒踮眠床哼哼叫，阿母講你這條命是撿回來的。
彼年的冬尾，阿母腹肚陣悶仔痛，一陣一陣，愈ju2來愈捷，伊喊你緊去請大鼻婆仔來。
雖然福來仔叔in兜佮咱厝甘但隔一條路，你踮厝頭前，慎誠久，毋知欲安怎去供開喙。大鼻婆仔是福來仔叔的老母，伊供庄仔內的抾囝，是產婆。後來常常聽你講：歲頭仔食㣛半百，欲閣生老囝，真見笑。我出世時，大兄已經二十歲矣。
袂記得是幾冬前，我去參加台北三重埔蘆狄社會大學「心理傳記書寫」課程，賴誠斌老師叫阮遮个學員回想家己捌代誌時，第一個記持是啥？
當我目睭瞌瞌kheh-kheh，畫面清楚的看到，那日晚頭仔，咱兜煙筒頂沖煙時，阿母供一桶燃hiânn燒的面桶水，捀來門口埕。我們爸仔囝坐踮臉一桶仔邊底椅仔頂相向，你用手掌，撐開唯臉盆內捘焦的面巾，佇我目睭瞌瞌的面bin4，輕輕仔拭，等我目睭裭開，風吹咧我个面，蓋秋凊。你供的身軀洗一半，開喙喊當咧無閒煮飯个阿母緊來，唯灶跤出來的阿母，紲手供我閣洗另一半，你倆人、兩段式的作伙完成我小小的身軀洗盪tng4，遮的，到我大漢才體誤出來。
當我有才調賺錢，裁縫間的工課一日比一日濟，兼欲讀暗學仔，無閒的日子，時間敢若過着特別緊。有一日，早起食早頓時，阿母徛倚來我身邊講：恁爸pa5昨瞑攏無睏，伊講厝邊隔壁攏咧關心，查某囡是欲留咧硩厝角乎？原來你睏袂去，是咧操煩這个屘查某囝猶袜成。這款話，後來不時佇我的耳空邊餾，你急欲供我捒出家門。
我結婚彼工，你歡喜看到我穿著新娘衫。當tng鼓吹、炮仔聲唯外面愈來愈接近咱兜時，你佮阿母行入去房間後，偷偷拭tshit目屎，毋甘查某囝變別人的，彼年，你74歲。回門日，咱翕相，相片裡的你，笑㣛一個喙仔開開開。
結婚後，為著工課阮搬到北部。你講：路頭遐遠，偃ian2起來拄天，想欲看一下查某囝多難喔！見擺，我若拍電話講欲𤆬囡仔坐火車轉來，你著騎腳踏車去甘仔店，買恁孫尚愛吃的孔雀餅。
幾年前，阮轉來咱故鄉，佇厝後掘一塊菜畦種菜，沃菜的時攏會想到你。逐擺轉外家，我會踅唯以前台糖五分仔車鐵枝路拆除的打馬膠路，我會停跤徛咧水溝仔邊，咱认前圳邊種菜彼搭， 敢若看到我細漢時，幫忙攑水漩仔濺水tsuānn tsuí沃菜。
佇這七月底，欲倚八八節的腳兜，我想欲供阿爸講：你即馬好否？
全站熱搜
留言列表
