close
昨早起
鵝老母猶iu閣生一粒卵矣，
厝後菜園的後尾彼橛kue̍h8，
種菓子樹跤，飼一隻鵝母
原本買一對，唯牠出世，毛猶黃錦錦時著買來飼
飼到鵝雄仔時
鵝鵤破病煞無去。
彼當時，
無耐心的我，
是誠反對飼精牲仔，
園主人講：
兩个人蹛這號庄外，
闊莽莽khuah-bóng2-bóng2的園，
蹛起来感覺真虛微，
飼ㄧ寡動物作伴，0
會使予捻草，
逐工照顧in，通好做議量。
南部氣候燒熱，
熱天時仔，拋荒的園內焦燥
他提一個大的跤桶，
水不時貯滇滇tīnn4-tīnn4，
予鵝仔囝沐水。
逐工看到in雙雙對對，𤆬tshuā8出𤆬入𨑨迌tshit-thô，
誠古錐kóo2-tsui ，
到徛秋時，雨水真齊勻，
園面雜草發甲茂om5閣幼，
兩隻相𤆬tshua8園裡四界踅，那踅那捻Liam3草，
會使予in三頓食甲飽歪歪，
即馬，賰孤單的鵝母
黒皮仔三不五時會來佮伊耍，
耍甲予伊嘎嘎叫。
中秋節過後，
厝頭前彼條路，
透早天袂光，阿仲兄的鐡牛仔聲！噗！噗！響著，
向村內的農民，喧响講：起床囉！秋耕開始矣！
面對休耕後拋荒的土地，
我開始有一種孕育新生命的喜悅，
著麻煩駛鐵牛仔的阿仲兄，若有閬縫，來供阮紡田、也麻烦萬教兄來袚股phua̍h7，
準備種作一寡農作物來變工藝，
南爿，墊兩畦青仁黑豆、一股紅豆，
北向龍爿彼面，種白菜、高麗菜、山茼萵、紅菜頭、白菜頭、山東白菜
種甲十花五色
歸日無閒菜園，工課真濟若狗毛，
唯開始，落幾袋有機糞，供攪拌，掖種籽、植菜苗，
一個月後，
本成白莽莽的園面，
歸片菜園仔色彩青翠、真媠。
恐驚鵝母會來菜畦裡thún踏、叨菜，
姑不而將，用亞鉛網仔和亞鉛鉼，共伊圍咧果子園內隔離，
逐日看到伊徛佇遐，若親像誠寂寞，死趖死趖𧙕扭掠liú-lia̍h
果樹大欉蔭蔭im3-ng2，少草，
驚牠枵iau，
頭家著去市區買幾落擺飼料，來予牠做飯頓，
半個月後，
看牠蹛亞鉛網仔跤，筅塌一窩，認真叨草仔枝，原來是欲做一個岫，
隔無幾工，
岫𥚃，兩粒白蔥蔥，顯目若棒球大粒，用草屑仔掩咧，
目睭褫金一看，原來是鵝蛋，
飼主講：鵝鵤無矣，鵝卵無雄，
抾入去煎蔥仔卵做菜配，
早頓煎蛋餅。
這段期間，
除了家己食，
有的佮親朋分享，
無疑悟伊兩三工著生一粒，生袂煞。
飼養精牲仔，我無耐心佮愛心，
時常面對某項動物，會驚惶kiann-niann5，
有當時仔，挽菜有菜箬ha̍h8仔，欲挈khe̍h8予食時，
伊著頷頸ām4-kún2伸長長，嘎啊！嘎啊！
親像欲叨人，
予無膽的我，倒退幾落步，歸身軀起雞母皮。
前幾工，飼鵝的主人出外旅行，
早晚兩頓，這號工課，我著愛搣飼料予食，
遂擺我若行倚去，
伊著：嘎啊！嘎啊！供我嚇驚，
予我心肝穎inn2仔，噗pho̍k8！噗！惝tshíng2，
好不容易，才將早頓飼完，
目睭看到亞鉛網仔腳，一粒白白的鵝蛋，
我張持一下仔久，
趁伊咧食飼料， 無注意的時，
向ànn3腰伸手欲去抾時，
伊隨翻頭，頷頸伸來著唯我的手啄落下，
捅手盤一跡，紅甲欲出血，
誠疼！
聽講鵝有區域性，
會堅守in的地盤，
鵝鵤無矣，
生卵、孵卵傳序細仔，守護後代，是鵝母的天職，
莫怪闊莽莽的果子跤，佗攏毋去，
伊甘但踮岫的米外遠彼箍圍仔行踏，
我咧想，有生無孵，對鵝來講，毋知有偌爾仔「疼」
手提彼粒蛋，心内有一種講袂出的感覺，
心情誠歉疚，
原來我是一個食物鏈的「強食者」！
全站熱搜
留言列表
