close
食老哺無土豆
昨日，去拜訪一個舊年才熟識的朋友
我對伊蹛的所在青疏，按伊予我的地址
揣誠久才揣來到巷仔底in兜的門跤口
看到她唯厝前巷內行出來
一伐一伐行路慢慢仔若親像龜咧趖
腹肚閣縖ㄧ條護腰帶
她攑頭看到我
就共我講：她拄仔行出來爁日頭
前幾工去病院開刀龍骨，換兩擳骨頭， 銀票用咧二十幾萬，即麻猶閣咧靜養
真好意邀請我入去厝內面坐
我踅唯厝後面，先共機車拄予好
紲手Sua3共紙箱仔的蔬菜搬落來
按後尾門入去伊兜的灶跤
將菜匟入去tshai7咧灶台正爿面彼台冰箱內
騎機車按日頭赤炎的外面踏入厝內
打開冰箱時
視覺有一陣暗黑
伸手共目睭皮挼挼的擘金
冰箱內的物件匟甲誠整齊
三十幾年的透天舊厝，前後面攏有巷路
樓跤厝內間格
大約有二十出頭坪
樓梯格開前後
前面橛是客廳
我呵咾o-lo2伊厝內面拼咧真清氣
她講：
是查某囝三不五時仔會轉來鬪拼掃
伊誠好禮𤆬我去頭前面的客廳
那講那介绍帖佇歸面壁的相片
我擔頭目睭綴她的手指頭仔尾，指著掛佇壁面頂的幾落组結婚相
她講：
這張是阮細漢查某囝佮囝胥
彼個是貳查某囝的後生
正爿這張是大漢囝
嫁去美國飛機愛飛幾落點鐘
不過逐年攏會轉來看我
看她歡頭喜面咧介绍壁頂規片壁排密喌喌的相片，我正足斟酌欲看詳細時
她反轉身，牽揫我的手，誠好禮一直叫我踮客廳椅仔坐落來
連鞭liam5-mi目頭結起來說：
伊三十歳著無翁婿
三個囝攏是家己一个查某人晟養大的
囡仔的老爸佇30幾年前就綴人走
到今毋知死亦活全沒消息
我即麻孤單一个人家己蹛
歸身軀全是病
逐工攏著食「愛睏藥仔」才會睏得
有時陣閣足驚嚇
驚睏到半瞑，就按呢tso3-an2-ne睏死去毋知通睲
煞死無人知喔！
她按櫥仔頂面屜提一包藥袋仔，褫開予我看講：
醫生開一堆藥仔啦
我若無食這粒白色的，會睏袂去
這粒食ㄧ爿咧治憂鬱症
另外這粒是預防想袂開的
唉唷！做人哪會遮爾仔艱苦喔
有時想講欲歸氣死死的卡快活
我真詳細咧聽她講，毋過一粒頭殼綴咧玲瓏踅
看她即馬心肝裡敢若拍結毬，敨袂開
原來這陣憂鬱、擔心、寂寞⋯⋯咧面對她生活的每一工
我咧想：
她毋但m7-na7真無簡單，共囡仔晟養大漢，也攏成家啊，
照理講，即馬正是享受清閒的時陣才對
敢講這一路行來承受的艱苦
著愛一條一條用腦汁參落去絞絞咧，閣再寛寬仔用喙去哺
這就是做人的無奈
一時，煞予我想到阮庄，蹛大路邊彼个七、八十歲的老大人
in兜是二樓起的透天厝面對庄內的大路
厝前兩爿用一面牆仔佮路格界
阮拄仔退休轉來的前幾年
時常會佇庄內佮伊相拄
麻定定出現佇廟埕榕仔樹跤和一陣老大人開講
阮相拄時，四常看到伊頭載癸笠、面包包袱巾、喙䫌擦甲紅記記、畫目媚、點胭脂
歡頭笑面佮相搪tng7的人拍招乎
有時手襪仔整齊橐long5到肩胛頭，歸身軀掩咧密喌喌
這款的打扮
常常佇庄頭出入
袂輸敢若欲去園面做工課
這兩三年，若親像較少佇社區看到伊
我拄著仔透早出去運動
有當時仔騎自轉車
會踅唯怹兜的門跤口經過
看到伊透早
猶原歸身軀是彼款的打拌
蹛in兜厝頭前的牆仔邊
面向hjong3路恬恬坐咧ㄧ條矮椅仔頂
若看到有人按路經過
毋管對方是行路、騎機車、或者是駛轎車
伊攏正手攑懸懸，面帶笑容共來來去去的過路人
無論是有熟識，或者是無相捌，伊攏一个一个共人擛手拍招乎
這款的畫面，曾經予我心肝底感覺誠礙虐gai5-gioh8
我咧想，人若食老，體力消失，安妮是伊過日子的方式！
有一工早起
我五點睲來
用步輦的按牛稠溪邊踅一大輾
轉斡行唯in兜厝前彼條路經過
看圍牆仔的大門已經拍開
伊定定坐彼跡hit-jiah的椅仔頂
煞空空無人
我停跤徛著，目睭擘大大
面向牆仔內，相siong3咧一觸仔久
揣無伊的人影
心肝內咧想：伊今仔日大概睏較宴起
我双跤伐咧貓霧仔的路上，回神㩮頭，佇遠遠看到一个真熟識的身影，雙手扞佇跤踏車的手扞仔，行路跛咧跛咧，沓沓仔tauk8-tauh8按路的彼頭，那行那倚來，鐵馬車後架疊幾落片紙箱仔
原來是伊喔！
我講：
阿桑，妳遮爾仔gau5早，是去佗位？
伊講：去載紙箱仔
我：妳最近敢若誠久無去社區活動中心啊？
她：跤趺退化，跤路無好，無想欲出門
我咧想：跤路歹，遮爾仔早，用自轉車仔做拐仔捍，毋知托若遠去載遮的紙盒仔？
徛咧伊面頭前的我，想起38年前離開故鄕時，遮的長輩，in少年粗勇時，佇庄跤這塊土地，用in的汗水，滴落土壤，灌溉這片田園，晟養後生、查某囝長大成人
農業転形工業後，囝兒仔媳婦離開故鄉，去他鄕外里揣頭路趁食
庄腳的長者，歳頭越來越大，毋管是身手矯健、亦或是到了風中的臘燭
毋管拄時仔想著少年彼個時陣，是偌爾仔會飛天鑽地
或是逐工坐咧厝內等時間、算日子，唉聲嘆氣過著每一工？
想到遮，我忽然回神，看到身軀邊這個五十幾歲的朋友，滿面愁容
我緊坐落來，牽著伊個双手講：
看妳即馬的氣色𧙕䆀
龍骨閣手術咧誠四是
我麻佮妳仝款，晚時仔麻真歹睏
醫生教我三個撇歩誠有效
第一：正面思考，咱愛想好的這爿
第二：運動，運動會使得共這粒玲瑯踅的頭殼放空
第三：用腹肚喘氣，供飛來飛去的這粒「心念」，匟咧丹田
看伊心神集中咧聽我講甲喙角全是波
我回神直覺：家己紅目墘、煞咧賣目藥。
老、病是自然律中不可避的過程
生理的衰老既然阻擋祙牢
心靈的健康就得努力追求
著愛看咱要按怎去面對！
全站熱搜
留言列表
