古月金帛 的部落格

        （四十三）十一月二十八日

   最近，天氣較冷，想欲去買一隻雞來燖四物仔，走去隔壁庄田外，一戶人家，家己飼食麥片、放園跣土虫、抾菜箬仔無食飼料的有機雞，去夠位，頭家娘講：「誠歹勢啦，拄好阮查某囝欲生，留欲予「做月裡」；閣問我「九斤雞」好嗎？我今仔咧想「九斤？彼大隻」。頭家娘紲喙講：毋是九斤，是名叫九斤雞。隨後，伊跤手真緊，著共雞仔掠來我面頭前說：妳看，雞鵤，面紅膏赤蠘，拄咧tshio，燖補尚好。頭家娘捧踮手兮九斤雞，一直滾躘，雞目睭閣對我金金相。拄咧猶豫時，頭雞娘講：這愛掠去請機器刣，問我敢欲跺？我講彼大隻會使一雞貳吃，雞腿剝骨來做「醉雞」。

經過一點鐘後，共刣好兮雞仔提咧，轉來到厝，蹛灶跤展開塑膠橐仔共看覓，拄才活趒趒兮九斤雞，跺佮一塊一塊，倆支「剋骨」兮腿，骨肉分離。我用棉紗線，共碎碎，肉離離落落兮雞腿，綁予整形時，予我想起做囝仔的時，庄跤拄著年仔節仔，家家戶戶，攏會咧前一暗，共明仔載欲刣兮雞，掠起來關兮雞籠仔内，等明仔早起，阿母用蔴繩先共雞跤、雞翅綁咧，叫我搣一盤仔秫米，共盤子捀咧，雞仔掠著，去琵伯怹兜，予琵姆仔刣，胡厝年節時刣雞仔鴨仔，攏是琵姆仔代勞，阮遮兮囡仔，佇埕尾遐排隊等候。雞仔欲刣進前，琵姆仔要共索仔先敨起來，安尼，雞仔閣去出世跤才會當行路。琵姆仔坐咧低椅仔，一跤hân咧雞翅，一跤踏雞跤，一手搦雞頭，一手共頷頸仔前的毛，挽挽乎清氣，欲落刀時，琵母仔會唸：『做雞做鳥無了時，去揣大厝，出世予好額人做囝兒』。刣落彼下，雞仔開始拍翸，雞翼仔一直撇，頷頸仔血那流，伊兮氣力那消失，無偌久，無氣矣，就按呢「化氣」。

   定定看到新聞報講：吃素救地球；麻有做善事兮宗教團體，宣導短片叫人少食肉，莫殺生。

今仔吃雞肉時，心咧想：我無刣雞，雞仔因為我按呢「化去」。著想咱人，敢有彼號法力，賜予怹重投胎，予好額人做囝兒。