古月金帛 的部落格

   『冬至是冬天，家家戶戶人團圓，有錢人三kám五kám也是圓，散兇人，一kám半kám嘛是圓；保庇大家官食百年，保庇翁婿賺大錢，保庇小姑仔嫁無人欲挃』。頂懸這首祈禱文，是新婦佇冬至時，敬拜神明、祖先時兮，共祖先講兮話。紲落是佇細漢時，聽大嫂講兮詳細故事。是一首鬥句、誠趣味的姑嫂對話詩句。故事是咧描寫：一位今仔嫁予人做新婦兮查某囡仔，入夫家，人面生疏，袂習慣，娶來了後，恬恬攏毋講話；茨內有一个勥跤小姑著講：「加擔啊加擔，阮兜兮阿嫂，娶來三年矣攏毋做聲，我欲共伊tshuā轉去還怹阿娘。」阿嫂聽到，對話講：『加鵻啊加鵻，有人送姑仔出，無人咧送嫂開。』欲倚冬至，小姑仔刁故意，緊共飯篱偷偷仔揭去藏起來，欲予伊阿嫂揣無開喙問，毋過，毋講話的新婦仔，著想一个辦法，規氣共鱟桸提來釘空，做飯籬用，麻佮飯篱仝款，會使罟圓仔來拜拜。

     逐年冬至兮時，故事裡kám壺裡紅圓花紅媠，摃槌仔聲硞硞叫；捀人飯碗兮新婦、揭一支鐵鎚仔釘空兮鱟桸、對灶跤罟紅圓仔，到大廳拜拜公嬤，兄嫂小姑吟詩答喙鼓，規兮畫面攏會佇頭殼裡踅一輾。

   時代無仝矣，即嘛欲食圓仔毋免家己挲，市場、超市，鹹的、甜兮，攏買會得到。毋過，我猶是較甲意過以前兮冬節彼號氣氛。

   記得細漢時，冬節欲到，序大人，著先去米絞店，糴秫米起來匟，佇冬至進前兩工，共秫米洗洗咧，放水落去淹過米，浸咧三點鐘久了後，才㨻起來，摜去間仔用石磨仔挨，將布粿袋仔承好兮粿漿，喙口綁予好，囥蹛椅條面頂，用索仔繚予絚，閣愛用大粒石頭硩予牢，等隔一眠，米漿焦鬆矣，就是粿粞，共粿粞用菜礤礤礤咧，捻留一塊起來，用水煠予熟，通好做粿酺，粿粞粿酺，參參做伙落去撋予齊勻，khiū-嗲嗲兮圓仔粞完成，阮遮兮囡仔著會使開始挲圓仔，捏家己甲意兮雞仔鳥仔造型。我尚歡喜的是，圓仔烰好時，阿爸會叫阿母罟幾粒仔起來匟下碗裡，共紅圓仔，黏蹛門扉上，這款犒賞器物兮習俗，稱為「餉耗」。

   隔轉工，阮遮兮枵饞囡仔，夯來一條椅頭仔跂跤，相爭共堅乾的圓仔捻起來，匟入去灶坑炰來食，即嘛想起來彼號氣味，真是懷念啊。