早起，日頭誠炎，下晡煞起北風，彼款風，搧入毛管孔，乎人會起交懍恂，南部早晚溫差大，今仔日，氣象報講，愈晚會愈濕冷，欲晚，趕緊共寒熱兩用的膨床翻身換爿，閣提出來頂日曝好的毛毯，舒好床巾，哈啾哈啾，啾袂停，坐佇眠床，戇神戇神，記憶閣一擺搝返去細漢秋冬時，透北風、曝棉被兮味覺。
透北風，是我細漢每年擔心的季節；曝被，攏是佇每年這兮時陣。記得細漢時，有一日，阿爸幫身材小細的阿母，共硩佇衫仔廚頂，用塑膠袋仔包咧，彼領十斤重兮棉被提落來，供棉被捥到埕尾，阿母和阿爸共棉被披咧靠（khuà）佇竹篙叉仔彼枝竹篙，予曝日頭。有時陣，竹篙披衫，著曝蹛阿爸定定踮榕仔跤歇中晝，咧䖙（the）彼隻籐椅，阿爸會揭一支竹子尺，出力佇棉被身軀bu̍t-bu̍t 拍拍咧，拍予蓬鬆，拍伽棉絮颺颺飛，日頭袂落山，阿爸共被捥入去茨內，下咧開闊的通鋪頂懸，共棉被穿入落去洗好，有日頭香的被單內，了後，伊著開始一直拍咳啾，喘氣有一點矣無仝，暗頓食飯時，阿爸人siān-siān，阿爸對塵蟎過敏，台灣海島形氣候，徛秋時濕氣重，塵蟎厚，北風若透，是氣喘好發季節，阿爸兮大氣喘閣夯起來矣。彼晚，看阿爸坐蹛眠床邊，呿呿嗽，尻脊骿，靠䖙倚壁，那嗽那喘，阿母提落來，掛佇壁彼包「寄藥包仔袋」，房間暗眠摸，微微光兮燈火跤，揣彼包頂面印有一身老公仔痚呴喘嗽兮便藥，予阿爸硩嗽，我目睭金金，欶著香香兮棉被味，看阿爸、阿母，規瞑無睏。
五、六十年代，庄跤，交通無方便，醫療資源匱乏，藥廠業務員來寄藥包，是家家戶戶必備家庭醫療藥，藥包仔內有涼涼兮要布，囝仔人常常唸鬥句的：目睭疼糊目眉，喙齒疼貼下頦，腹肚疼貼肚臍，這款涼涼兮藥布，若手扭到，貼落了後，著幾落工毋免鬥做家事；還有鹹橄欖味，吃起甜甜涼涼，枵饞囝仔常常揭椅子跂跤偷食的胃散；喙齒疼時，阿母會挖一絲仔萬用兮〈萬金油〉，包棉仔，撚予一粒米粒大，窒咧蛀齒空內，一觸仔久就袂疼。寄藥包仔文化，帶予彼个醫療資源缺乏年代的人，頭燒耳熱時，適時減除病痛佮安全感。〈十一月二十三〉
留言列表
